यादव पक्षं थःपिं आधिकारिक जूगु दाबी
मधेशी जनअधिकार फोरम (यादव पक्षं) थःपिं हे आधिकारिक जूगु दाबी याःगु दु ।
फोरम संसदी दलया ज्याकूथीं मंगलवाः पत्रकार सम्मेलन यानाः यादव पक्षं थःपिं नाप ६० प्रतिशत केन्द्रीय दुजःत दुगु दाबी याःगु दु । यादव पक्षं निर्वाचन आयोगं एकपक्षीय रुपं गच्छदार पक्षयात जक सनाखतया निंतिं सःतुगु धासें थंज्याःगु ज्यां आयोगया निष्पक्षताय् तकं शंका ब्वलंकीगु द्वपं ब्यूगु दु । गच्छदार पक्षं आयोगय् न्हूगु पार्टीया निंतिं दाबी याःगुलिं उमिसं या:गु फोरम आधिकारिकताया माग खारेज जुइमाःगु दाबीं नं यादव पक्षं याःगु दु ।
पत्रकार सम्मेलनय् अध्यक्ष उपेन्द्र यादवं गच्छदारं सरकारय् च्वनाः पदया दुरुपयोग यासें केन्द्रीय दुजः व सभासद्त न्याःगु द्वपं बियादिल । वयेकलं गच्छदार पक्षं केन्द्रीय दुजः देयेकेत स्वयाच्वंम्ह आर. पी. यादव भारतया लखनऊलय् च्वनीम्ह भारतीय नागरिक जूगु व यादव नाप नेपाःया नागरिकता नं मदुगु दाबी यानादिल ।
