तलब सम्बन्धि समस्या वार्ता माफर्त : अर्थमन्त्री
तलब बृद्धि मयाःगुलिं कर्मचारीत पाखें विरोध
अर्थमन्त्री सुरेन्द्र पाण्डें निजामति कर्मचारीतय् तलब सम्बन्धि समस्या वार्ता मार्फत ज्यंकीगु खँ धयादीगु दु ।
मंगलवाः निजामति कर्मचारीतय्सं सरकारं न्ह्ब्वःगु आर्थिक दँ २०६६/६७ या बजेटय् कर्मचारीतय् तलब बृद्धि मयाःगु धासें विरोध यायेवं थःगु हे ज्याकूथी पत्रकार सम्मेलन यानाः अर्थ मन्त्री पाण्डे थंज्याःगु खँ धयादीगु खः । वयेलकं थ्व तःधंगु विषय मजूगु धासें थुकीया समाधान वार्ता मार्फत पिकायेगु धयादिल ।
थ्वस्वयां न्ह्य: सरकारं सोमवाः न्ह्यब्वःगु आर्थिक दँ २०६६/६७ या बजेटय् निजामती कर्मचारीतय् तलक बृद्धि मयाःगु धासें कर्मचारी संगठनतय्सं अर्थ मन्त्रालय घेराउ यासें सिंहदरवार दुने प्रदर्शन याःगु दु ।
मंगलवाः सुथय् गुताः ईलंनिसें थीथी कमर्चारी संगठनया नेतृत्वय् सुरु जूगु जुलुसय् प्राय दक्वं मन्त्रालयया कर्मचारीतय्सं ब्वति काःगु खः । सत्तारुढ नेकपा (एमाले), नेपाली कांग्रेस, प्रमुख प्रतिपक्ष एकीकृत नेकपा (माओवादी) लगायत थीथी दल निकटया प्राय दक्वं कर्मचारी संगठनतय्सं तलब बृद्धि मयाःगु धासें प्रदर्शनय् ब्वति काःगु खः । प्रदर्शनया कारणं सिंहदरवार दुनेया ज्याकू वये-वने यायेत समस्या जूगु खः ।
सरकारं सोमवाः न्ह्ब्वःगु बजेटय् कर्मचारीतय् तलब बृद्धि मयासें सरकारं महँगीयात ध्यानय् तया अधिकृतस्तर स्वयां च्वये १० प्रतिशत व अधिकृतस्वयां क्वयेया तहया कर्मचारीया तलबय् १२ प्रतिशतं महँगी भत्ता जक बीगू निर्णय याःगु खः ।
