पोखराय् अनिश्चितकालया निंतिं माइक्रोबस चलेयायेत रोक
सवारी दुर्घटनाय् सीम्ह व घाःपा जुपिनि छेँजः पिंसं दोषीयात कारबाहरी यायेमाःगु व उचित क्षतिपूर्तिया माग यासें पोखराय् अनिश्चितकालया निंतिं नगर माइक्रोबस चलेयाये मबीगु जूगु दु ।
मंगलवाः सुथंनिसें माइक्रोबस चालेयाये मबीगु खसाः यातायत व्यवसायीत नाप क्षतिपूर्तिया माग यासें जूगु वार्ता बिना निष्कर्ष क्वचायेवं अनिश्चितकाली माइक्रोबस चलेयाये मबीगु घोषण याःगु खः ।
वार्ताय् सीम्ह व घाःपाः जुम्ह छेँजःपिसं क्षतिपूर्ति स्वरुप ८ लाख बीमाःगु माग याःगु खसाः यातायात व्यवसायीतय्सं छगूत्याः लाख स्वयां अप्व बीमफैगु धावेयं वार्ता बिना निष्कर्ष क्वचाःगु खः ।
पोखरा उपमहानगरपालिकाया लामाचौरय् सोमवाः सनिलय् ग. १. ख. १७८६ नम्बरया माइक्रोबसं ग. २. प. ८०३० नम्बरया मोटरसाइकलया ठक्कर ब्यूवलय् घाःपा जुम्ह मोटरसाइकल चालक नीदँया प्रितम गुरुङ वास याकाच्वंगु ईलय् मदुगु खः । अथेह मोटरसाइकल सवार लामाचौरया हे नीन्ह्यदँया किसन गुरुङ घाःपा जूगु खः । घाःपा जुम्ह गुरुङयात आः मणिपाल शिक्षण अस्पतालय् वासः याकतःगु दु ।
अथेहे विराटनगरय् छगः भारतीय नम्बरया ट्रकं मोटरसाइकलयात ठक्कर ब्यूवलय् मोटरसाइकल सवार निम्ह सीगु दु । विआर १९४८०७ नम्बरया भारतीय ट्रकं को. ४. प. २७४४ नम्बरया मोटर साइकलयात ठक्कर ब्यूवलय् विराटनगरय् च्वनिपिं अलि अब्बास व वयेकया म्हय् अजाज सीगु खँ प्रहरीं धाःगु दु । निम्हेसितं वासः याकेत कोशी अस्पताल यंकेगु झ्वलय् ल्यँ मदुगु खः ।
