२ खर्ब ८५ अर्ब ९३ करोडया बजेट प्रस्तुत
अर्थमन्त्री सुरेन्द्र पाण्डें सोमवा: व्यवस्थापिका संसदयय् आर्थिक दँ २०६६/६७ या बजेट न्ह्यब्वयादीगु दु । थुगुसीया बजेट कार्यान्वयनया निंतिं कुल २ सय ८५ अर्ब ९३ करोड बिनियोजन याःगु दु । कुल खर्च मध्ये चालु खर्च ५६ दशमलव १८ प्रतिशत अर्थात १ सय ६० अर्ब ६३ करोड २४ लाख व पूँजीगत खर्च ३७ दशमलव ३५ प्रतिशत अर्थात १ सय अर्ब २८ करोड ४८ लाख दु । प्रस्तावित खर्च चालु आर्थिक वर्षया तुलनाय् ३३ दशमलव ८७ प्रतिशतं अप्व खः ।
कुल खर्च मध्ये साधारण प्रशासन पाखे १ सय ३५ अर्ब ५८ करोड २५ लाख अर्थात ४७ दशमलव ४२ प्रतिशत व विकास पाखे १ सय ५० अर्ब ३४ करोड ७५ लाख अर्थात ५२ दलमलव ५८ प्रतिशत विनियोजन याःगु दु । आगामी दँया खर्च मुंकेत राजस्वया वर्तमान स्रोत पाखें १ सय ६१ अर्ब ७ करोड २६ लाख, वैदेशिक अनुदान पाखें ५६ अर्ब ९५ करोड ५६ लाख, वैदेशिक ऋणपाखें २१ अर्ब ५६ करोड ६ लाख व्यवस्था यायेगु खँ बजेटय् न्ह्यथंनातःगु दु । आन्तरिक व वैदेशिक स्रोत परिचालन यायेवलय् ४६ अर्ब ३४ करोड २ लाख न्युन जुइ ।
संसदय् बजेट न्ह्यब्वसें अर्थमन्त्री पाण्डें राजनीतिक दलत दथुइ राष्ट्रिय सहमति निर्माण यायेगु, संवैधानिक सर्वोच्चता व सुशासनया प्रत्याभुति बीत पुलांगु दक्वं सम्झौता व सहमति कार्यान्वयन यायेगु धयादिल । वयेकलं अरावकता, असुरक्षा व दण्डहिनताया अन्त्य यासें शान्ति प्रकृयायात पूणता बीगु, निधारित ईलय् राष्ट्रिय सहमतिया आधारय् न्हूगु संविधान निर्माण यायेगु व राज्य पुर्नसंरचना व सामाजिक आर्थिक रुपान्तरणया आधार निर्माण यासें आर्थिक विकासयात तिव्रता बीत बजेट केन्द्रीत जूगु धयादिल । पाण्डें बजेट स्वदँया अन्तरिम योजनाय् आधारित जूगु धयादिल ।
मन्त्री पाण्डें चालु आर्थिक बृद्धिदर आधारभुत मुल्यय् ३.८ प्रतिशत व उत्पादन मूल्यय् ४.७ प्रतिशत जुइ कथं संशोधित अनुमान न्ह्ब्वयादिल ।
सोमवाः व्यवस्थापिका संसदय् न्ह्यब्वःगु बजेटय् द्वन्द्वकालय् नष्ट जूगु भौतिक संरचना निदँ दुने पुनर्निमाण यायेत, आगामी आर्थिक दँया निंतिं २ अर्ब ३५ करोड बिनियोजन याःगु दु । अथेहे द्वन्दोत्तर विकास निर्माणया निंतिं २ अर्ब ११ करोड बिनियोजन याःगु दु । थ्व ज्याझ्वः पाखें २६०किलोमिटर सतक ४०गु पुल, झुलुंगे पुल १०४गु चीचीधंगु खानेपानी योजनाया निर्माण ज्या न्ह्याकेगु ताः तःगु दु ।
प्राकृतिक प्रकोप पाखें विस्थापितयात पुर्नस्थापना व तत्काल राहतया निंतिं १ अर्ब ३० कारेड फ्यानातःगु दु । दक्वं नेपामियात राष्ट्रिय परिचय पौया कथं निर्वाचनय् नं छ्यलेजी कथं फोटो सहितया स्मार्ट कार्ड वितरण याइगु जूगु दु । वृद्ध व अन्य सामाजिक सुरक्षा भत्तात नं वहे कार्ड छ्यला न्ह्यागु नं बैंकं लिकाये फइगु व्यवस्था आगामी आर्थिक दँय् लागू याये त्यनागु जानकारी अर्थमन्त्री पाण्डें बियादिल । सुरक्षा प्रणालीयात सवल, सक्षम देयेका दण्दहीनताया अन्त्य यायेत गम्भीर प्रकृतिया अपराध नियन्त्रण व अनुसन्धाया निंतिं छगू अलग्ग हे ब्यूरो पलिस्था यायेगु लक्ष्य नं बजेटय् तयातःगु दु ।
