बन्द जूगु विराटनगरय् तनाव
कजेजय् ब्वनीम्ह छम्ह मिसायात ट्रकं क्यला स्याःगु द्वपंनय् खुगू विद्यार्थी संगठनं विराटनगर सोमवाः बन्द याकूगु खः । उमिसं विराटनगर इटहरी सहायक राजमार्गया थीथी थासय् टायर च्याकाः लँ बन्द याःगु खः ।
महेन्द्र मोरङ क्याम्पसय् आइए निगूगु दँय् अध्ययनरतय् नर्वदा चौधरीयात क्याम्पसं छेँय् लिहावनाच्वंगु ईलय् ना. २. ख. ८७८२ नम्बरया ट्रकं ठक्कर ब्युवलय् सीगु खः । ठक्करलिपा घाःपा जुम्ह चौधरीयात ट्रक व्याक यानाः स्याःगु द्वपं विद्यार्थीतय्सं ब्यूगु दु । चौधरीयात स्याःगु विषययात कया विद्यार्थी संगठनं सोमवाः निसें अनिश्चितकालीन यातायात बन्द याःगु दु ।
सीम्हेसिया छेँजःयात क्षतिपूर्ति बीमाःगु, दोषीयात कारवाही यायेगु माग यासें खुगू विद्यार्थी संगठनतय्सं सोमवाः विराटनगर बजाः बन्द याःगु खः । बजाः बन्द याकाःजुपिं विद्यार्थी संगठनया कार्यकर्तातय्सं सतकय् टायर च्यकाः लँ अवरुद्ध याःगु खसाः छगू दर्जनं स्वयां अप्वः सवारी साधनय् तोडफोड याःगु दः । सवारीसाधनय् तोडफोड यायेवं विराटनागरय् तनाव जूगु खः ।
