आदिवासी अधिकार बारे ज्याझवः
येँ (सन्ध्या टाइम्स)/न्हूगु संविधानय् दुथ्याकेमाःगु आदिवासीतय् अधिकारयात कयाः म्हिगः थन छगू ज्याझवः जुल ।
नेवाः स्वायत्त राज्य मंकाः संर्घष्ा समितिया ग्वसालय् जूगु उगु ज्याझवलय् नेवाः देय् दबूया संरक्षक मल्ल. के सुन्दरं संविधानय् दुथ्याकेमाःगु आदिवासी जनजातिया अधिकार बारे ध्वाथुइकादीगु खः ।
ज्याझवलय् वय्कलं गुलिखे आदिवासी नेतातय्सं हे आदिवासी अधिकार छु खः धकाः मथुयाच्वंगुलिं नेपाःया सभासद्तय्त थुकिया बारे ध्वाथुइकेगु कथं अवधारणा तयार जूगु खँ नं कनादिल ।
उगु ज्याझवलय् प्राध्यापक माणिकलाल श्रेष्ठ, एमालेया नेता राजेन्द्र श्रेष्ठ, नेपाः लोकतान्त्रिक नेवाः संघया नायः सानुराजा शाक्य व नेवाः देय् गुथि नेपालमण्डलया नरेन्द्रभक्त हाडापिंसं नं न्हूगु संविधान च्वज्यायात कयाः थःथःगु नुगः खँ प्वंकादीगु खः ।
