न्ह्यागु जूसां संसद निं अवरुद्ध

सरकारं सतक जाम यानाः यातायात बन्द याइपिंत तुरुन्त कारवाही यायेगु नीति ला हल तर स्वयम् सरकार दयेकेगु ज्या याइपिं राजनीतिक पार्टी दुने धाःसा आः सतक जाम यायेगु पलेसा संसद जाम यायेगु अभियान शुरु जूगु थें च्वं । माओवादीं जाम यानातःगु सदन बल्ल बल्ल खोले जुल, म्हीग हानं फोरमं सदन अवरुद्ध यानाः थःपिनि विरोध प्रकट यात । फोरमया संसदीय दलया ज्याकू सुनां प्रयोग यायेगु धइगु ल्वापुया कारणं म्हीग छगू पुचः फोरम सभासदतय्सं सदनय् नाराबाजी यानाः ज्या हे न्ह्याके मबिउगु खः । थुकिं यानाः सरकारं हःगु नीति तथा कार्यक्रमय् जुइमाःगु सहलह ज्याझवः तकं प्रभावित जूगु दु । उगु अवरोधं यानाः नीति तथा कार्यक्रमय् म्हिगः छन्हु हे जक सहलह यानाः ज्याझवः क्वचायेका छ्वःगु खः ।

थःपिनि खँ लादे यायेत आः पार्टी दुने संसद अवरुद्ध यानाः समस्या सिर्जना यायेगु न्हूगु कथंया ल्वय् पिहां वल थें च्वं । कांग्रेसं शुरु याःगु थ्व महामारी माओवादी लिपा आः फोरमय् सरे जुयाच्वंगु दु । थम्हं धाःगु खँ मन्यंतले संसद अवरुद्ध यानाः छुं हे कारवाही न्ह्याके मबीगु थ्व पलाखं यानाः सदनपाखें यायेमाःगु जनताया ज्या थातिं लानाच्वंगु जक मखु संविधान च्वयेगु ज्या तकं प्रभावित जुयाच्वंगु दु । राजनीतिक रुपं वइगु समस्या समाधान यायेगु अनेक उपाय दुसां नं उकियात अवलम्बन मयासे छक्वलं संसद अवरुद्ध यायेगु थेंज्याःगु पलाः न्ह्याकाः राजनीतिक पार्टीतय्सं जनताप्रतिया थःपिनि गैरजिम्मेवारीपह बांलाक हे ब्वयाच्वंगु दु । संसदयात थःगु मर्यादाय् तयाः मन्ह्याकल धाःसा सांसदतय् नं मर्यादा व प्रतिष्ठा मदइगु खँयात सकलें पार्टीतय्सं मनन यायेमाःगु आवश्यकता दु ।

More Stories Like this