सेना थ्यंकः वयेवं गामय् राहत
येँ (सन्ध्या टाइम्स)/पश्चिमी पहाडी लागाय् न्यना वनाच्वंगु झाडाबान्ता पीडिततय्त राहत थ्यंकेत प्रधानमन्त्री माधव नेपालं निर्देशन बियादीगु दु ।
थौं सुथय् प्रधानमन्त्री नेपालं स्वास्थ्य मन्त्री, गृहमन्त्री व फुक्कं सुरक्षा निकायया प्रमुखतलिसे सहलह लिपा उगु निर्देशन बियादीगु खः ।
वय्कलं ल्वय् न्यनाच्वंगु थासय् याकनं स्वास्थ्यकर्मी छ्वयेत व पीडिततय्त राहत व क्षतिपूर्ति बीत नं निर्देशन बियादीगु खः ।
उखे झाडा बान्ताया कारणं रुकुमय् थौं नं थप छम्ह सीगु दु ।
मेखे स्वास्थ्यकर्मी व वासः सहित वंगु नेपाली सेनाया छगू पुचः गांगामय् थ्यंगुलिं जाजरकोट व रुकुमया स्थानीय वासिन्दां राहत महसुस याःगु दु । 'वासः व डाक्टर थ्यंकः वःगु दु, आः ला म्वाइगु आशा ब्वलंगु दु' छम्ह स्थानीय वासिन्दां धाल ।
रुकुम व जाजरकोटय् जक झाडा बान्तां यानाः सछि स्वयां अप्वः मनू सीधुंकूगु दुसा आपालं विरामी जुयाच्वंगु दु ।
