प्रधानमन्त्रीइ सुजाताया चर्चा !
येँ (सन्ध्या टाइम्स)/ सरकार व माओवादी दथुइ जूगु सहमति लछिया दुने कार्यान्वयन याकेगु लागिं निगू पुचः दथुइ दुनें दुनें खँल्हाबल्हा जुयाच्वंगु खँ सूत्रतय्सं धाःगु दु । माओवादीं थ्व सहमति एमालेलिसे याःगु खःसां नेपाली कांग्रेस तयार मजूतले थ्व लागू याये फइगु सम्भावना मदुगुलिं माओवादीं गोप्य रुपं कांग्रेस सभापति गिरिजाप्रसाद कोइरालालिसे नं खँ न्ह्याका च्वंगु खँ धाःगु दु ।
थ्व सहमति कार्यान्वयन यायेगु लागिं माओवादीं नेकां सभापति कोइरालाया म्ह्याय् सुजाता कोइरालायात प्रधानमन्त्री दयेकेगु प्रस्ताव समेत न्ह्यःने यंकाच्वंगु खँ सूत्रं धाःगु दु । प्रधानसेनापति कटवालयात चीकाः मेम्ह प्रधानसेनापति हयेगु माओवादीया प्रस्तावयात सुजाता कोइरालां र्समर्थन याःगु खः ।
न्हापां प्रधानमन्त्री माधव नेपालयात हे थ्व ज्या सम्पन्न यायेत इनाप यायेगु व छुं जुयाः वय्कलं मयात धाःसा सुजातायात जूसां न्ह्यःने हयाः थःपिनि माग पूवंकेगु प्रस्ताव माओवादीं तःगु खँ धाःगु दु ।
माओवादीया थ्व खँय् कोइराला नं सकारात्मक जूगु सूत्रया दावी दु । वास्तवय् कोइरालां उकी नं बिचाः याये धाःगुलिं हे माओवादीं सदन चायेकेत सहमति क्यंगु खँ नं सूत्रं धाःगु दु ।
