स्वनिगः बन्दया ख्याच्वः
येँ (सन्ध्या टाइम्स)/ थिमिया चपाच्वय् अपहरणकारी धइगु द्वपं बियाः दायाः सीपिं विद्यार्थीतय् छेँजः व स्थानीय मनूतय्सं यदि कन्हय् तकया दुने नं थःपिनि माग सरकारं पूमवंकल धाःसा कंसं निसें अनिश्चितकाल तक स्वनिगः बन्द यायेगु ख्याच्वः बिउगु दु ।
सीपिं विद्यार्थीतय् छेँजःयात क्षतिपूर्ति बियाः अपराधीयात कारवाही यायेमाः धइगु माग यासें उमिसं थौं नं कोटेश्वर लागाय् निघौ चक्का जाम यात । थःपिनि निरन्तर ज्याझवःया झवलय् कन्हय् ११ निसें १ बजे तक सिंहदरवारय् धर्ना बीगु ग्वसाः उमिसं दयेकूगु दु । यदि कन्हय् तकया दुने नं थःपिनि माग पूमवंकल धाःसा कंसंनिसें स्वनिगः बन्द यायेगु ख्याच्वः उमिसं बियातःगु दु ।
थुकिया निंतिं उमिसं छगू संघर्ष समिति नं गठन यानातःगु दु । उमिसं आः तक सीपिनि लाश तकं उठे मयाःनिसा प्रशासनं लाश उठे यायेत दवाव बियाच्वंगु खँ धाःगु दु ।
