ट्याम्पु र्यालीं सतक जाम
येँ (सन्ध्या टाइम्स)/ग्याँस ट्याम्पुयात स्वनिगलं चीका छ्वयेगु सरकारी निर्ण्रय विरुद्ध थौं ग्याँस ट्याम्पुतय्सं थन छगू र्याली पिकयाः थःपिनि असन्तोष जाहेर यात । उमिसं थौं न्हूगु वानेश्वरंनिसें ट्याम्पु र्याली पिकयाः थ्व विरोध क्यंगु दु । र्यालीं यानाः उगु लागाया यातायात नं प्रभावित जूवंगु दु ।
उखे येँया माइतिघरय् छगः माइक्रोबसं ठक्कर नकाः निम्ह मोटरसाइकल सवार सीगु घटनायात कयाः थौं लगंख्यःया स्थानीय जनतां उगु लागाय् यातायात अवरुद्ध याना बिल । दुर्घटनाय् लानाः यलया रामकृष्ण श्रेष्ठ व सीता पोखरेल सीगु खःसा आः सीपिनि छेँजःयात क्षतिपूर्ति बीमाः धइगु माग यासें थ्व यातायात बन्द ज्याझवः याःगु खः ।
