छवाःया कारोबार कुहां वंसा नेप्से च्वय्
येँ (सन्ध्या टाइम्स)/नेपाल स्टक एक्सचेन्जय् थुगु छवाःया दुने जूगु कारोबारं नेप्से वाःया न्हापांगु न्हिया तुलनाय् २७ दशमलव ७२ अंकं थहां वनाः लिपांगु न्हि ७०२ दशलमव ८८ अंकया विन्दुइ थ्यंकाः बजाः बन्द जुल । वाःया न्हापांगु न्हि ६७५ दशमलव १६ अंकं कारोबार शुरु जूगु खः ।
थुगु वालय् मुक्कं चय्खुगू कम्पनीया ४५०२ कारोवारं गुंगू लाख स्वद्वः व न्हय्सः कित्ता शेयर न्याये-मी जुयाः स्वीच्यागू करोड नीस्वंगू लाख झिंस्वद्वः तका दां बराबरया कारोवार जुल । थुगु वालय् जूगु कारोबार दांया ल्याखं थुगु वालय् जूगु कारोवर स्वयां १७ दशमलव ३६ प्रतिशत कुहां वःगु दु ।
थुगु वाःया स्वयां छवाः न्ह्यः ४५४७ गू कारोबारं झिंगुंगू लाख ख्वीस्वद्वः व न्हय्सः कित्तापाखें पीखुगू करोड नीखुगू लाख व झिंगुद्वः तका दां बराबरया कारोबार जूगु खः ।
थुगु वाःया कारोबारय् 'क' वर्गया कम्पनीया सूचकांक मापन याइगु सेन्सेटिभ नं वाःया न्हापांगु न्हिया तुलनाय् ८ दशमलव ९९ अंकं थहां वनाः वाःया लिपांगु न्हि १८८ दशमलव ०९ अंकय् थ्यंगु दु ।
'क' वर्गय् लाःगु कम्पनीया जक झिंखुगू करोड गुइखुगू लाख तकाया कारोवार जुल । 'क' वर्गया थुगु कारोबार थ्व वालय् नेप्सेय् जूगु कूल कारोवारया ४४ दशमलव ३६ प्रतिशत खः ।
थुगु वाःया कूल कारोबारय् दकलय् अप्वः खुगू करोड नीस्वंगू लाख दां व दकलय् अप्वः निगू लाख पीगुद्वः कित्ता शेयर कारोवार याःगु आधारय् नेपाल बङ्गलादेश बैंक व संख्याया आधारय् च्यासः व गुइन्यागू कारोबार याःगु पशुपति विकास बैंक दकलय् न्ह्यःने लाःगु दु ।
