नीति तथा कार्यक्रमय् हे सत्तारुढतय् विवाद
एमाले, कांग्रेस, फोरमया बछि ब्व व तमलोपा समेत जानाः दयेकूगु वर्तमान सरकारया नीति तथा कार्यक्रम आः नकतिनि पिहां वःगु दु । ता: ई तक दिनाच्वंगु संसद अधिवेशन खुल्ला यायेगु सहमति माओवादीलिसे जुइवं चायेकूगु सदनय् राष्ट्रपति डा. रामवरण यादवं नीति तथा कार्यक्रम ब्वनादीगु खः । नीति तथा कार्यक्रमयात विपक्षी माओवादीं विरोध याइगु ला स्वाभाविक हे जुल, स्वयम् सरकारय् हे दुथ्याःगु कांग्रेस व फेारमं समेत विरोध याना हःगुलिं थ्व कार्यक्रमया औचित्यय् हे न्ह्यसः पिहां वःगु दु । थ्व कार्यक्रमयात उमिसं संयुक्त सरकारया कार्यक्रम मखुसें एमाले याकःचिया कार्यक्रम थें च्वन धासें उकी संशोधन प्रस्ताव तयेमाःगु बिचाः समेत पित हःगु दु ।
वर्तमान सरकार एमाले याकःचिया मखु । अझ धायेगु हे खःसा थ्व सरकार गठन यायेगु ज्याय् स्वयम एमाले स्वयां नं कांग्रेसया अप्वः भूमिका दु । कांग्रेस सभापति गिरिजाप्रसाद कोइरालाया प्रस्ताव व प्रयासया लिच्वः कथं हे थ्व सरकार गठन जूगु खः । उकिं कांग्रेसं थुकी दवाव कायम यायेत स्वइगु स्वाभाविक खः । अथे हे फोरम थ्व सरकार निर्माणया दकलय् निर्णायक शक्ति हे जुल ।
थ्व नीति तथा कार्यक्रमय् एमालें वहे पुलांगु लोकप्रिय ज्याझवःत हःगु दु गुकियात पूवंकाः एमालें जनमत थःगु पक्षय् काइ धकाः तत्कालिन कांग्रेसं सरकार हे क्वःथला बिउगु खः । एमालें थः याकःचिगु सरकारया पालय् हे लागू याये मफुगु थ्व ज्याझवः आः कर्पिनि निर्देशनय् चले यायेमाःगु सरकारय् च्वनाः गथे लागू याये फइ धकाः पत्याः यायेथाय् म्हो जक दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
