सरकारया नीति व ज्याझ्व: बहुमतं पारित
सरकारया नीति व ज्याझ्व व्यवस्थापिका संसदं बहुमतं पारित जूगु दु । नीति व ज्याझ्वलय् संसदय् जूगु मतदानय् ३०५मत पक्षय् लाःगु खसाः २५१ मत विपक्षय् कुतुवंगु खः ।
असार २५ गते सरकारया पाखें राष्ट्रपति डा. रामवरण यादवं संसदय् न्ह्यब्वयादीगु नीति व ज्याझ्व:स आइतवाः सहलह जूगु खसाः सभासदतय्सं न्यंगु न्ह्यसया लिसः प्रधानमन्त्रीं माधवकुमार नेपालं बियादीगु खः । प्रधानमन्त्री नेपालं यक्व दलत नाप सहलह यानाः सहकार्य व सहमतिया माध्यमं नीति व ज्याझ्वः पेश यायेमागुलिं छगू हे कथं जुइ मफूगु धयादिल । वयेकलं राष्ट्रिय हितयात ध्यानय् तयाः सरकारं थ्व ज्याझ्वः हःगुलिं संशोधन प्रस्तावत लित कयाः पारित यायेत इनाप यानादीगु खः ।
संसदया बैठक न्ह्यायेवं सभामुखनाप ईकया न्ववासें माओवादीया सभासद् डा. बाबुराम भट्टराईं असंवैधानि तरिकां गठन जूगु सरकारं हःगु ज्याझ्वःलय् जुइगु सहलहस ब्वति कायेत आवश्यक मदुगु धयादिल । वयेकलं माओवादी जननिर्वाचित सरकारया मर्फात सेना तयेमाःगु पक्षय् दुगु धयादिल । वयेकलं न्ववायेवं माओवादीं सहलह बहिष्कार याःगु खः ।
माओवादी नेता भट्टराईनं न्ववायेवं सरकारया नीति व ज्याझ्वःस सहलह न्ह्याःगु खः । कांग्रेस नेता रामचन्द्र पौडेलं सरकारं हःगु नीति व ज्याझ्वःया कार्यान्वयन पक्षय् आः दक्वसिया ध्यान केन्द्रीत यायेमाः धयादिल । वयेकलं माओवादीं थःगु जक खँ तयेगु व मेपिनीगु खँ मन्यनीगु प्रवृत्तिया नं विरोध यानादिल ।
अथेहे एमालेया अध्यक्ष झलनाथ खनालं सरकारया नीति व ज्याझ्वः हरेक पक्षं बांलाःगु दाबी यानादिल । मधेशी जनअधिकार फोरमया नेता जयप्रकास गुप्तां ज्याझ्व:स मधेशया समस्या दुमथ्याकू धासें आपत्ति प्वंकूसें आलोचनात्मक समर्थन यानादिल ।
अथेहे तराई-मधेश लोकतान्त्रिक पार्टीया नेता हृदेश त्रिपाठी लगायत नेतातय्सं सरकारया ज्याझ्वः जनतया माग कथं मजूगु धासें कूंखिनादीगु खः ।
सरकारया नीति व ज्याझ्वःयात संसदय् सहलह यायेत नीनिघौ फ्यानातःगु खसां फोरमया आन्तरिक विवादया कारणं शनिवाः संसद बैठक च्वनेमफेवं आइतवाः झिंछघौ जक सहलह यानाः पारित याःगु खः ।
