सरकार थःगु हे कारणं क्वदली : माओवादी
एकीकृत नेकपा (माओवादी)या नेतातय्सं एमाले नेतृत्वया सरकार सत्ता गठबन्धन दलया हे कारणं याकनं हे क्वदलीगु खँ धाःगु दु ।
छुं न्हि न्ह्य: निसें माओवादीया मू ज्याकू कोटेश्वरय् न्ह्यानाच्वंगु केन्द्रीय समितिया बैठकय् सरकारं न्ह्यब्वःगु नीति व ज्याझ्वःलय् हे सत्ता गठबन्धन दलया असहमति दुगुलिं सरकार याकनं हे क्वदलीगु खँ नेतातय्सं धाःगु खः । अध्यक्ष पुष्पकमल दाहाल 'प्रचण्ड'या राजनीतिक प्रतिवेदनय् थीथी राज्य समितिं थःथःगु निष्कर्ष पेश यायेगु झ्वलय् आइतवाः खुगू पुचःलं थःगु निष्कर्ष पेश यायेगु झवलय् थ्व सरकारया पतन लिपा माओवादीया नेतृत्व राष्ट्रिय सहमतिया सरकार गठन यायेमाःगु खँय् बः ब्यूगु खः ।
अथेहे अध्यक्ष प्रचण्डया प्रतिवेदनय् आगामि कार्यदिशा प्रस्त मजूगुलिं थुकी प्रस्त कार्यदिशा दुथ्याकेत इनाप याःगु दु । आः प्रतिवेदनय् निष्कर्ष पेश याये ल्यं दनीगु न्यागू पुचःलं सोमवाः निष्कर्ष पेश याइगु ज्याझ्वः दु ।
