फोरमया आधिकारीकता आयोग इजलासपाखें क्वछीगु
मधेसी जनअधिकार फोरमया आधिकारीकता विवादबारे निर्वाचन आयोगं आइतवाः निगूलिं पक्ष नाप सहलह याःगु दु । सहलहस निगूलिं पक्ष छप्पं जुइगु सम्भावना मदुगु धायेवं फोरमया आधिकारीकता निर्वाचन आयोगया इजलासं याइगु जूगु दु ।
सहलहलय् निगूलिं पक्षं थःथःगु खँ तःगु व आः आयोगया निर्णय पियाच्वंनाःगु खँ यादव पक्षया नेता जयप्रकास गुप्ता धयादिल । सहलहलिपा विजयकुमार गच्छदारं मिलेजुया वनीगु सम्भावना मदुगुलिं आधिकारीकता बारे निर्वाचन आयोगं याइगु फैसला मान्य जुइगु धयादिल ।
गच्छदार पक्षं पुलांगु ३५ दुजः दुगु केन्द्रीय समितिया आधारय् दुजःतय् बहुमत गणना यायेमाःगु अडान कयाच्वंगु दुसाः यादव पक्ष कारवाहीलय् लाःपिं बाहेक दुजःतय् बहुमतं निष्कर्ष पिकायेमाःगु पक्षय् दु । निर्वाचन आयोगया ऐनय् धासाः केन्द्रीय समितिया बहुमत गाकीगु पक्षयात मू पार्टीया मान्यता बीगु प्रावधान दु ।
