संवाद मार्फत हे समस्या समाधन यायेगु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सहमति व सहकार्यया लुखा बन्द मजूगु व संवाद मार्फत हे समस्या समाधन यायेगु खँ धयादीगु दु ।
शनिवाः येँय् राष्ट्रिय सांस्कृतिक मञ्चं याःगु सम्मान व सांस्कृतिक ज्याझ्वलय् वयेकलं दलत दथुइ संवाद याना हे आःया हाथ्या पार यायेगु धयादिल । नेपाली जनतया एकता हे दकले बल्लाःगु तागत जूगुलिं माओवादीं देशय् न्ह्यागु कथंया परिस्थिति वसां दलत दथुइया अन्तरसम्वादयात निरन्तरता बीगु धासें अध्यक्ष प्रचण्डं राष्ट्रिय स्वाभिमान, स्वतन्त्रता व राष्ट्रिय अस्मिताया विषयस मंकाः एजेन्डा देयेका राष्ट्रिय हितया पक्षय् दनेमाःगु खँ बः बियादिल ।
अध्यक्ष दाहालं देशया स्वाभिमन व राष्ट्रियातय् खतारय् दुगु धासें आन्दोलनपाखें राष्ट्रियता बल्लाके माःगु धयादिल । वयेकलं परिवर्तन मयपिं राष्ट्रघाती व समर्पणवादीतय् कारणं लोकतन्त्र व शान्ति प्रकृयाय् ग्रहण लगेजूगु धासें संविधानसभायात निरिह यायेगु षड्यन्त्र जुयाच्वंगुलिं उकीया विरुद्ध संघर्ष यायेगु ख्याच्वः बियादिल ।
वयेकलं माओवादी शान्ति व संविधान निर्माणया पक्षय् दृढताया साथ दनेगु धासें आः देशय् खनेदयाच्वंगु राजनीतिक गतिरोध याकनं अन्त्य जुइगु धयादिल ।
