सुंन सैनिक सर्वोच्चताया पक्षय् मदु : प्रम
प्रधानमन्त्री माधवकुमार नेपालं गुंन दल सैनिक सर्वोच्चताया पक्षय् मदुगु खँ धयादीगु दु ।
शनिवाः एमालेया ज्याकू बल्खुइ एमालेया न्ह्ययनिगू जिल्लाया केन्द्रीय दुजःतय्त प्रशिक्षण् बीगु झ्वलय् वयेकलं थ्व खँ धयादीगु खः । एमालेया वरिष्ठ नेता नं जुयादिम्ह प्रधानमन्त्री नेपालं थःगु नेतृत्वय् गठन जूगु सरकारं सैनिक सर्वोच्चता कायम याये मबीगु दाबी यानादिल । प्रधानमन्त्री नेपालं थः संसदं निर्वाचित जुयाः प्रधानमन्त्री जुयागु धासें माओवादीं थःयात विदेशी इशाराय् प्रधानमन्त्री जूगु धयाः चरित्र हत्या यायेत स्वयाच्वंगु धयादिल ।
अथेहे ज्याझ्वलय् एमाले अध्यक्ष झलनाथ खनालं एमालेयात बल्लाका यंकेत न्हूगु आधार तयार यानाःगु धयादिल । वयेकलं एमालेया कार्यकर्तात सहरमुखी जूगुलिं गांमय् एमालेया अवस्था कमाजेर जूगु धयादिल । अञ्चल व जिल्लाया कार्यकर्तात थःगु थासय् वनाः ज्या यायेत नं वयेकलं निर्देशन बियादिल ।
अध्यक्ष खनालं पार्टी दुने व्यक्तिवाद, अराजकता व गुटबन्दी सह्यय मजुइगु धासें गुटबन्दी यायेत स्वःसा कारवाही यायेत ख्याच्वः बियादिल ।
छन्हुन्यंकया कार्यकर्ता भेलाय् स्वनिगःया बाहेक न्ह्ययनिगू जिल्लाया केन्द्रीय दुजःत व केन्द्रीय सम्पर्क मञ्चया नेतातय्सं ब्वति काःगु खः ।
