राष्ट्रपतिपाखें संहिष्णुता कायम यायेत इनाप
राष्ट्रपति डा. रामवरण यादवं देशय् जातिय व क्षेत्रीय अतिवादया नारा चरम रुप काःगु धासें सहिष्णुता आवश्यक जूगु धयादिल ।
शुक्रवाः येँय् साहित्यकार तथा प्राध्यापक दैवज्ञराज न्यौपानेया सार्वजनिक अभिनन्दा यायेगु ज्याझ्वलय् न्ववानादिसें वयेकलं जनता दथुइ पारस्परिक सद्भाव व सहिष्णुता आवश्यक जूगु धयादिल । वयेकलं राष्ट्र व राष्ट्रियताया सन्दर्भय् व मानवीय संवेदनाया अभिवृद्धिइ साहित्याया अतुलनीय भूमिका दुगु धयादिल ।
राष्ट्रपति यादवं नेपाः बहुभाषा व सम्पदाया तःमि देय् जूगु धासें दक्वं भाय्, संस्कृति व साहितायात संरक्षण यायेमाःगु व सभ्य समाजया निर्माणय् भाषा साहित्या भूमिका उल्लेखनिय जुइगु धयादिल ।
ज्याझ्वलय् राष्ट्रपति यादवं दोसल्ला न्येका सहित्यकार न्यौपानेया सम्मान यानादीगु खसाः संघीय मामला व राज्यपूर्ननिर्माण मन्त्री मिनेन्द्र रिजालं मन्त्री परिषदं ग्वाहालि स्वरुप ब्यूगु निगू लाख दां लःल्हानादीगु खः । छुं ई न्ह्यः निसें अस्वस्थ जुयादिम्ह न्यौपानेयात थीथी ख्यलं ग्वाहालि स्वरुप मुंकूगु प्यंगु लाख दां नं ज्याझ्वलय् लःल्हाःगु खः ।
