सभापतिया निंतिं सुशिल कोइरालां उम्मेदवारी बीगु
नेपाली कांग्रेसया कार्यवाहक सभापति सुशिल कोइरालां पार्टीया महाधिवेशनय् सभापतिया निंतिं उम्मेदवारी बीगु घोषणा यानादीगु दु ।
शुक्रवाः रिपोटर्स क्लबय् जूगु साक्षात्कार ज्याझ्वलय् कार्यवाहक सभापति कोइरालां थ्व खँ धयादीगु खः । वयेकलं पार्टीया महाधिवेशन कात्तिक-मंसिस दुने जुइगु जानकारी नं बियादिल ।
सरकारया नीति व ज्याझ्वःलय् गरिवनाप विशेश्वर, गणेशमान शान्ति अभियान, महिला जागरण अभियान लगायत ज्याझ्वःत दुमथ्याकूगु धासें वयेकलं असन्तुष्टि प्वंकादिल । कार्यवाहक सभापति कोइरालां वर्तमान सरकार सर्वदलीय सरकार जूगुलिं दक्वसित दुथ्याकाः न्ह्यावने माःगु धयादिल ।
राष्ट्रपतिं बिहीवाः न्ह्यब्वःगु नीति व ज्याझ्वलय् त्वःफिउगु खँत प्रधानमन्त्रीं थःगु सम्बोधनय् दुथ्याकीगु विश्वास कोइरालां प्वंकादिल । वयेकलं दण्डहीनताया अन्त्य व शान्ति सुरक्षाया प्रत्याभूति बीत सरकार जिम्मेवार जुइमाःगु धयादिल ।
