नीति व ज्याझ्वलय् च्यागू संसोधन प्रस्ताव दर्ता
राष्ट्रपति डा. रामवरण यादवं बिहीवाः व्यवस्थापिका संसदय् न्ह्यब्वयादीगु सरकारया नीति व ज्याझ्वःलय् असन्तुष्टि प्वंकूसें शुक्रवाः च्यागू संसोधन प्रस्ताव दर्ता जूगु दु ।
शुक्रवाः मधेशी जनअधिकार फोरम, सद्भावना पार्टी (आनन्ददेवी), नेकपा (माले), नेपाल मजदुर किसान पार्टी, नेकपा संयुक्त, राप्रपा नेपाल, संघीय लोकतान्त्रिक माचं संसोधन प्रस्ताव दर्ता याकूगु खः । शुक्रवाः सुथय् झिताः ईलंनिसें न्हिनय् स्वताः ईलय् तक संसोधन प्रस्ताव दर्ता यायेत ब्यूगु ईया दुने च्यागू संसोधन प्रस्ताव दर्ता जूगु खँ संसद सचिवालयं जानकारी ब्यूगु दु ।
सत्ता साझेदार नेपाली कांग्रेसं संसोधन दर्ता मयासां थुकीयात एकपक्षिय जूगु धासें असन्तुष्टि प्वंकूगु दुसाः प्रमुख प्रतिपक्षी दल एकीकृत नेकपा (माओवादीं) धासां अवैध सरकारं हःगु ज्याझ्वःया छुं अर्थ मदुगु धासें सहमति प्वंकेमफइगु खँ धाःगु दु ।
