अपराधीतय्त राजनीतिक संरक्षण दु : गृहमन्त्री
येँ (सन्ध्या टाइम्स)/थौंकन्हय् अपराधीतय्त राजनीतिक पार्टीतय्सं हे संरक्षण बियातःगुलिं उमिगु मनोबल थहां वनाच्वंगु खँ गृहमन्त्री भिम रावलं धयादीगु दु ।
अज्याःपिं अपराधीतय्त नं थम्हं कारवाही यानां तुं त्वःते धासें वय्कलं उकिया निंतिं सभासद्तय्सं थःत ग्वाहालि यायेमाःगु बिचाः नं प्वंकादिल ।
थौं सुथय् च्वंगु एमाले संसदीय दलया बैठकय् न्ववासें वय्कलं उगु खँ धयादीगु खः ।
वय्कलं धयादिल, 'अपराधीतय्त कारवाही यायेत गृह मन्त्रालयं गुगुं हे कसर बाँकी तइ मखु ।'
तर्राई लागाय् राजनीतिक स्वयां नं आपराधिक पुचःत अप्वः दुगुलिं उपिंलिसे वार्ता याये मफइगु खँ नं वय्कलं कनादिल ।
तर्राई लागाय् जक राजनीतिया नामं १०७ गू सशस्त्र पुचःत सक्रिय जुयाच्वंगु जानकारी नं वय्कलं बियादिल । थुपिं फुक्क हे अन चन्दा कायेगु, अपहरण यायेगु आदि ज्याय् संलग्न जुयाच्वंगु दु ।
