राजस्व वृद्धिदर लक्ष्य स्वयां अप्वल
येँ (सन्ध्या टाइम्स)/ माओवादी नेतृत्वया सरकारं न्ह्यब्वःगु महत्वाकांक्षी राजस्व संकलनया ज्या लक्ष्यय् थ्यंगु खँ धाःगु दु । तत्कालिन माओवादी सरकारं एक तिहाई राजस्व वृद्धिदरया लक्ष्य तःगु खःसा उगु लक्ष्य आर्थिक दँ क्वचाये स्वयां छवाः न्ह्यः हे पूवंगु खँ नं धाःगु दु ।
माओवादी नेतृत्वया सरकारं छगू खर्ब ३० अर्बया राजस्व लक्ष्य तःगु खः। अर्थ मन्त्रालयया प्रवक्ता शंकर अधिकारीया कथं असारया स्वंगूगु वाः तक १ खर्ब २९ अर्ब तका राजस्व मुनेधुंकूगु दु ।
जेठ तकया तथ्यांक कथं लक्ष्य स्वयां ३ प्रतिशत अप्वः राजस्व संकलन जुइधुंकूगु दुसा असार तक थुकिं निरन्तरता काइगु खँ मन्त्रालययया उच्च अधिकारीतय्सं धाःगु दु ।
बन्द, हडताल व राजनीतिक अनिश्चतताया दथुइ आर्थिक गतिविधि शुन्यय् कुहां वनाच्वंगु इलय् राजस्व संकलन उत्साहजनक रुपं जूगु खँय् धाःसा विज्ञत नं अजू चायाच्वंगु दु ।
उखे राजस्व संकलन दर अप्वया वनाच्वंसां वर्तमान सरकारं धाःसा म्हो जक राजस्व उठे यायेगु लक्ष्य तःगु खँ मन्त्रालय स्रोतं धाःगु दु । न्हापाया सरकारं करया दायर अप्वयेकूगुलिं वर्तमान सरकारं थुकियात म्हो याःगु खँ नं मन्त्रालय श्रोतं धाःगु दु ।
बजेट बारे ब्रिफिङ सरकारया नीति तथा कार्यक्रम र्सार्वजनिक जुइसातकि आः न्हूगु बजेट दयेकेगु ज्याय् सरकार लगे जूगु दु । अर्थ मन्त्रालयं तयार याःगु बजेट बारे प्रधानमन्त्रीयात ब्रिफिङ्ग यायेगु लागिं अर्थया छगू पुचः थौं प्रधानमन्त्री माधव नेपालयाथाय् वंगु दु । पुचलं बजेटय् छुं अन्तिम हिलाबुला यायेमाःगु दु ला धकाः सुझाव समेत कायेगु ल्याखं थ्व ब्रिफिङ्ग याःगु खः ।
उकथं हे उगु टोलीं राष्ट्रपति डा. रामवरण यादवयाथाय् नं बजेट बारे ब्रिफिङ्ग याइगु ग्वसाः दु । बजेटयात अन्तिम रुप बीगु निंतिं थौं सुथय् हे अर्थ मन्त्रालयय् विशेष बैठक च्वनाः उकियात मन्त्रालयस्तरं अन्तिम रुप बीगु ज्या याःगु खः । बजेट थ्वहे सोमवाः र्सार्वजनिक याइगु ग्वसाः दु ।
