छचाः वासः नये मखनाः सीपिं जनता

देय्या अति दुर्गम लागा जाजरकोट व वया जःखः लाःगु जिल्लाय् न्यनाच्वंगु झाडाबान्ता व उकिया सामान्य वासः तकं नये मखनाः मनूत सिनाच्वंगु घटना नेपाः जक मखु आः अन्तर्राष्ट्रिय चिउताःया विषय जूगु दु । थौंया विश्वय् झाडाबान्ता छगू सामान्य ल्वय् खः । इलय् उपचार जूसा उकिं छुं हे नोक्सान याइ मखु । तरनेपालय् झाडाबान्ता थेंज्याःगु सामान्य ल्वचं कयाः थ्यंमथ्यं सछिम्ह मछि मनूतय् ज्यान वनेधुंकूगु दु गुगु अतिकं हे मर्माहत जुइगु खँ खः ।

नेपाःया राजनीतिक पार्टी नेतात मन्त्री जुइत व ततःधंगु पद कायेत गुलि आतुर जुइगु खः उगु पदय् च्वनाः पद कथंया सेवा बीत उति हे अनुदार जुइगु जुयाच्वंगु दइ । थुकिया हे दकलय् मार्मिक दसु खः जाजरकोटया झाडाबान्ता । देशया गज्याःगु कुनय् गज्याःगु दुर्दशा जुयाच्वन धइगु खँ सरकारयात पत्रिकाय् समाचार ब्वनाः तिनि जानकारी दइ । पत्रपत्रिकां उकियात कयाः टिप्पणी च्वया हयेव तिनि मन्त्रीतय्सं आः थम्हं नं छुं यायेमाली धकाः बिचाः याइ । झाडाबान्ता थेंज्याःगु ल्वचं छुं यात धकाः मन्त्री हे ब्वाँय् वनाः स्वः वनेमाःगु नं खँ मखु । अज्याःथाय् नितका प्यतका वंगु वासः तक हे उपलब्ध मजुइगु धायेबलय् थ्व सरकार व स्वास्थ्य प्रशासनया चरम वेवास्ता

खः । दुर्गम थासय् स्वास्थ्य शिक्षाया कमी, बांलाःगु त्वनेगु लःया अभाव आदि कारणं थज्याःगु महामारी ल्वय्या समस्यात इलय् ब्यलय् पिहां वयेगु याः । थ्व आः जकया समस्या मखु । न्हापा नं तःक्वः हे थ्व समस्या वयेधुंकूगु दु । तर सरकारं उकी वास्ता मयायेगु धइगु थःगु देशया जनताप्रतिया गैरजिम्मेवारीपना व मनूया म्वायेगु अधिकारया समेत चरम हनन खः ।

More Stories Like this