ख्वपःया घटनाय् घाःपा जुम्ह थप छम्ह मन्त
ख्वपःया चपाचोय् मचा अपहरण याःवगु द्वपं बियाः स्थानीयवासितय्सं दागु ईलय् घाःपा जुम्ह थप छम्ह सीगु दु ।
मंगलवाः हिमचुलि बोर्डिङ स्कूलया विद्यार्थीयात अपहरण याःवगु द्वपं बियाः दागु इलय् प्यम्ह सख्त घाःपा जुया यलया बी एण्ड बी अस्पतालय् वास याकेत यंकूगु खसाः मंगलवाः हे सविन क्षेत्री व जीवन थापा मदुगु खः ।
अथेहे वास याकच्वंपिं निम्ह मध्ये वसन्त लामा शुक्रवाः सुथय् गुताः ईलय् अस्पतालय् मदुगु खः । मदुम्ह लामा कोटेश्वरय् च्वंगु नवज्योति इङ्गलिस बोर्डिङ स्कूलय् ब्वनाच्वम्ह झिंन्यादँ जक दुम्ह खः ।
शुक्रवाः हे ख्वपः घटनाया बारे छानबिन यायेमाःगु व हत्यारातय्त कारवाही यायेमाःगु माग यासें मदुपिनि छेँजःपिसं गठन याःगु संघर्ष समितिं ख्वपः जिल्ला प्रशासनय् धर्ना ब्यूगु दु । अथेहे संघर्ष समितिं हत्यारातय्त कारवाही यायेत प्रशासनयात नीप्यघौया अल्टिमेतम नं ब्यूगु दु । ख्वपः घटनाय् मदुम्ह जीवन थापाया मांया संयोजक्तोय् न्ह्यम्ह दुजः दुगु संघर्ष समिति गठन याःगु खः ।
