हिंसां राजनीतिक उदेश्य प्राप्त जुइमखु : प्रधानमन्त्री
प्रधानमन्त्री माधवकुमार नेपालं हिसांया माध्यमं गुंनं शक्तिं राजनीतिक उदेश्य प्राप्त यायेमफइगु खँ धयादीगु दु ।
वीरगञ्जय् शुक्रवाः नेश्नल मेडिकल कलेज शिक्षण अस्पतालया उल्लेज्या यानादिसें प्रधानमन्त्री नेपालं राजनीतिक उदेश्य हिसांया माध्यमं प्राप्त मजुइगु धासें दक्वं खँया हल संवाद मार्फत यायेफइगु धयादिल ।
वयेकलं तराईलय् सशस्त्र संघर्ष यानाच्वंगु पुचःयात नं वार्ताया माध्यमं समस्या समाधन याये फइगु धयादिल । सशस्त्र पुचःतय्त वयेकलं हिसां हत्या त्वताः वार्ताय् वयेत इनाप यानादिल ।
सरकारया मुख्य ध्यान शान्ति प्रकृयायात तार्किक निष्कर्षय् थ्यंकेगु व संविधान निर्माण ईलय् हे क्वचायेकेगु धासें प्रधानमन्त्री नेपालं आःया प्रमुख आवश्वकता संवाद, सहमति व सहकार्य जूगु धयादिल । वयेकलं धैर्यता, लगनशिलता व संयमता दुसां न्ह्यागु कथंया लक्ष्य नं प्राप्त यायेफइगु धासें दक्वं राजनीतिक पार्टीत छप्पं जुयाः न्ह्या वनेगुया विकलप मदुगु धयादिल ।
