नीति व ज्याझ्वःलय् कांग्रेस असन्तुष्ट
नीति व ज्याझ्व:या छुं अर्थ मदु : माओवादी
सत्तारुढ नेपाली कांग्रेसं सरकारया नीति व ज्याझ्वः एकपक्षीय जूगु धासें असन्तुष्टि प्वंकूगु दु ।
कांग्रेस शीर्ष नेतातय् शुक्रवाः सुथय् च्वंगु बैठकं सरकारया नीति व ज्याझ्वः एकपक्षीय जूगु ठहर याःगु खँ संसदीय दलया नेता रामचन्द्र पौडेलं जानकारी बियादिल । सरकारया नीति व ज्याझ्वःस कांग्रेसया मुद्दा समावेश मयाःगु धासें नेता पौडेलं असन्तुष्टि प्वंकादीगु ख: ।
कांग्रेसया मुद्दा गरिवनाप विशेश्वर लगायत विषयत सरकारया नीति व ज्याझ्वलय् दुमथ्याकूगु धासें थुकीयात एकपक्षीय जूगु ठहर कांग्रेसं याःगु दु । शुक्रवाः च्वंगु बैठकं कांग्रेसया मुद्दात प्रधानमन्त्रीया सम्बोधन व बजेटय् समावेश यायेमाःगु माग नं याःगु दु । अथेहे कांग्रेसं बजेटय् दुथ्याकेमाःगु विषयया बारे नं बैठकय् सहलह याःगु खः ।
अथेहे प्रमुख प्रतिपक्षी दल एकीकृत नेकपा (माओवादीं) सरकारया नीति व ज्याझ्वःया छुं नं अर्थ मदुगु ठहर याःगु दु । शुक्रवाः च्वंगु माओवादी संविधान सभा दलया बोर्ड बैठकं थ्व निर्णय याःगु खः ।
माओवादी वरिष्ठ नेता डा. बाबुराम भट्टराईं सरकार हे अवैधानिक जूगुलिं थंज्याःगु सराकारं हःगु नीति व ज्याझ्वःया छुं नं अर्थ मदुगु धयादिल । वयेकलं सरकारया नीति व ज्याझ्वःया बारे मेमेगु दलनाप नं सहलह यायेगु जानकारी बियादिल ।
