जाजरकोटय् मन्त्रीं हःगु वासः नं मगात
येँ (सन्ध्या टाइम्स)/ नेपाःया पश्चिमी पहाडी जिल्लाय् न्यना वनाच्वंगु झाडाबान्ताया प्रकोप अझं नियन्त्रणय् मवःगुनिगु खँ सीदुगु दु ।
पश्चिमी पहाडी जिल्लाया जाजरकोटं न्यना वंगु झाडाबान्तां आः रुकुम व बाजुराय् नं लिच्वः लाकेधुंकूगु दु ।
झाडाबान्ताया कारणं जाजरकोटय् जक ८८ म्ह मनूया ज्यान वनेधुंकूगु दुसा रुकुमय् १५ व बाजुराय् स्वम्ह सीधुंकूगु दुसा अझ मेपिं झिंनिम्ह विरामी जुयाच्वंगु दनि ।
ताः इलंनिसें पहाडी लागाय् झाडाबान्ता न्यना वनाच्वंसां म्हिगः जक अन स्वास्थ्यमन्त्री उमाकान्त चौधरी स्वास्थ्यकर्मी व वासः ज्वनाः उगु लागाय् थ्यंगु खः । तर वय्कलं ज्वना वःगु वासः नं मगाःगु खँ अनया स्थानीय चिकित्सकतय्सं धाःगु दु ।
सरकारं प्यम्ह न्याम्हेसित जक वासः छ्वयाहःगु दु तर थन विरामी २० म्ह स्वयां अप्वः दुगु खँ छम्ह स्वास्थ्यकमर्ीं कन ।
उखे स्थानीय जनतां धाःसा सरकार राजनीतिक कासाय् जक लिकुना मनूतय्त सामान्य स्वास्थ्यय् तकं खेलवाद यानाच्वंगु द्वपं नं बियाच्वंगु दु ।
स्थानीय जनतां सरकारं इलय् ध्यान बिउगु खःसा थुलि मनू मसीगु खँ धाःगु दु ।
