चीनय् उइगुर जातिया व्रि्रोह

चीनया सिन्जियान प्रान्तया उइगुर जातिं थःपिनि अस्तित्व बचे यायेगु लागिं याःगु संर्घषयात दमन यायेगु लागिं सरकारं याःगु कारवाहीलय् लानाः सत्या स्वयां अप्वः मनू सीधुंकूगु समाचार पिहां वःगु दु । लिसें थुगुसी उइगुर जातिं याःगु आन्दोलनया प्रतिरोधय् अनया बहुसंख्यक हान जाति नं कुहां वःगु व उमिसं नं उइगुरतय्त दमन शुरु याःगु दु । थ्व निश्चय नं दुःखया खँ खः ।

सिन्जियान उइगुर जातिया बाहुल्यता दुगु थाय् खः । तर अन आः हान जातिया जनसंख्या अप्वया ववं उइगुरतय्त धमाधम अल्पमतय् लाकेगु ज्या जुयाच्वंगु दु । थ्व अतिकं गलत खः । चीनं तिब्बत, हंगकंग आदि लागाय् नं हान जातिया मनूतय् बसोबास अप्वयेकाः उकियात जातीय रुपं 'चिनीकरण' यानाच्वंगु द्वपं वयेगु याः । चीनया ९० स्वयां अप्वः प्रतिशत जनसंख्या दुगु हान जातिया अहंकार न्हापांनिसें चर्चाया विषय जू । न्हूगु चीनया निर्माता माओ त्से तुङ स्वयम् छम्ह हान खः । हानतय्के दुगु थ्व बहुमतया हुंकारं मेमेगु अल्पमतया जातियात पीडित मयायेमा धकाः माओं हानतय्त संयमित जुइगु आपालं मन्त्र कना थकूगु दु । ख ला आधुनिक चीनया निर्माण झवलय् हान जातिपाखें अज्याःगु अहंकार क्यनेगु ज्या गनं नं मयाः । कम जक जनसंख्या दुपिं चिचीधंगु जातियात नं उमिसं उलि हे सम्मान याः । तर आः उइगुर जातियात दमन यायेत हानत नं कुहां वल धाःगुलिं उमिगु अहंकार पुनः दना वःगु जकं खः लाकि धइगु शंका पिकया बिउगु दु । थ्व बिचाः यायेमाःगु विषय खः । लिसें यदि द्वपं वः थें उइगुरतय्सं थ्व आन्दोलन चीनयात मछिंकेगु लागिं जक यानाच्वंगु खःसा उकियात कयाः नं बिचाः यायेमाःगु आवश्यकता धाःसा दइ ।

More Stories Like this