राष्ट्रपतिपाखें व्यवस्थापिका बैठकय् नीति व ज्याझ्व: प्रस्तुत
राष्ट्रपति डा. रामबरण यादवं न्हूगु संविधान ईलय् हे निर्माण यायेगु निंतिं सहमती, सहकार्य व सम्झौताय् ब: बियादीगु दु । आर्थिक दँ ०६६ /०६७ या नीति व ज्याझ्व: बिहीवा: व्यवस्थापिका संसदया दँ अधिवेशनय् न्हब्वयादिसें राष्ट्रपति यादवं कानुनी राज्य निर्माणया निंतिं सुरक्षा निकायया दक्वं अंग व निजामती कर्मचारीयात सतर्क तयेगु धयादिल । वयेकलं राजमार्गय् जुइगु बन्द, हडतालयात दीकेत दक्वं दल च्वना: राष्ट्रिय सहमति यायेगु धयादिल । उकीया निंतिं स्वंगूगु पक्षया विमा ज्याझ्व: लागु यायेगु धयादिल । येँया गोकर्णय् सहिद पार्क व चम्पादेवीलय् जाति संग्रहालयया निर्माण यायेगु जानकारी बियादिल । अथेहे वयेकलं संविधान निर्माण याये न्ह्य: हे माओवादी सेनाया रेखदेख व समायोजन यायेगु ज्या क्वचायेकीगु खँ न्ह्यथंनादीगु दु । स्थानिय निकायया निर्वाचन मजुतल्ले उकिया निंतिं अन्तरिम व्यवस्था यायेगु खँ राष्ट्रपति यादवं धयादिल ।
गणतन्त्र नेपा:या न्हापांम्ह राष्ट्रपतिया कथं व्यवस्थापिका संसदय् निक्व:गु खुसी सम्बोधन यासें राष्ट्रपति यादवं मधेसी जनअधिकार फोरम लगायत मेमेगू पक्षनाप जूगु सहमतियात कार्यान्वयन याइगु धयादिल । उकीया निंतिं राष्ट्रिय शान्ति व पुर्नस्थापना आयोग गठन यायेगु घोषण यानादिल । मुक्त कमैया, भूमीहीनया निंतिं विशेष ज्याझ्व: ह्येगु धयादिल । वयेकलं किसानतय् खाद्य मलया विक्री वितरणय् सहुलियतया व्यवस्था याइगु ज्याझ्वं ह्येगु जानकारी बियादिल । जनतायात सेवा, सुविधा बीत सरकारी ज्याझ्व:यात चुस्त व दुरुस्त देयेकीगु धयादिल । विद्युत संकट समाधानया निंतिं ग्रामिण विद्युतीकरणय् विशेष ब: बीगु धयादिल ।
ज्याझ्व:लय् विपन्न व गरीव बर्गया निंतिं राज्य सुविधा परिचय पत्र वितरण यायेगु व उकीया हे आधारय् सरकारी सुविधाय् प्राथमिकता बीगु व्यवस्था या:गु दु । अथेहे राष्ट्रसेवक कर्मचारीतय् मनोबल उच्च यासें कार्य दक्षताया अभिबृद्धि यायेत व स्वच्छ व दक्ष प्रशासन मार्फत जनविश्वास आर्जन यायेगु धासें नीति व ज्याझ्व:लय् उच्चस्तरीय तलव आयोगया प्रतिवेदनयात आधार देयेका सुविधाय् समयानुकुल अप्वयेकीगु खँ न्हयथंनात:गु दु ।
व्यवस्थापिका संसदय् राष्ट्रपति यादवं नीति व ज्याझ्व: न्ह्ब्व:गु ईलय् एकीकृत नेकपा (माओवादीं) बहिष्कार मयासें सक्रिय ब्वति मकायेगु नीति कथं माओवादीया पाखें संसदीय दलया उपनेता नाराणकाजी श्रेष्ठ प्रकाश व प्रमुख सचेतक पोष्टबहादुर बोगटीं जक ब्वति का:गु ख: ।
