नेपाल विकास बैंकया संरक्षक व अध्यक्षयात ज्वनेत पत्राचार
नेपाल राष्ट्र बैंकं नेपाल विकास बैंकया संरक्षक उत्तम पुन व अध्यक्ष अमर गुरुङयात ज्वनेत प्रहरीयात पौ च्वःगु दु ।
नेपाल विकास बैंकय् जूगू छगू अर्ब च्यागू करोड बराबरया ठगी, हिनामिना व हानी-नोक्सानीया निंतिं तत्काल ज्वनां कारवाही यायेत प्रहरीयात पौ च्वःगु ख: ।
केन्द्रीय बैंकं निगू ब्याग्लं पौ च्वयाः ठगी, हिनामिना, हानी-नोक्सानीया सम्बन्धय् उगु बैंकया पदाधिकारीतय्सं याःगु अपराधया अनुसन्धान याना कानुनी कारबाही यायेत नेपाल सरकार, गृह मन्त्रालय, प्रहरी प्रधान कार्यालय - येँ, अर्थमन्त्रालय, राजश्व विभाग - यल व अर्थ मन्त्रालय आन्तरिक राजश्व विभाग - येँय् पौ छ्वःगु खः ।
बैंकया पदाधिकारीतय्सं गैर कानुनी रुपं होलिल्याण्ड स्कूल, द गोर्खा हाइड्रोपावर प्रालि व सिने साउण्ड इण्डष्ट्रिज लगायत संघ संस्थायात त्यासाः ब्यूगु व बैंकया ७२ करोड ३२ लाख निक्षेप जोखिमय् लाकूगु खँ राष्ट्र बैंकं धाःगु दु । अथेहे उमिसं लगानीकर्तापाखें ३६ करोड स्वयां अप्वः ध्यबा ठगय् याःगु खँ राष्ट्र बैंकं पिथंगु विज्ञप्ति न्ह्यंथनातःगु दु ।
