बबन सिंहं थः छेँजः विरुद्ध मुद्दा
सभासद् बबन सिंहं थःयात गोली क्येकूम्हेसित कारवाहीया माग यासें बिहीवाः निम्ह थःहे छेँजः विरुद्ध जिल्ला प्रहरी ज्याकू रौतहटय् निवेदन दर्ता याकूगु दु ।
सभासद् सिंहं थः तबाः रन्तेश्वरप्रसाद सिंह व वयेकलया काय् अरुणकुमार सिंहया नांमय् जिल्ला प्रहरी ज्याकूथी कारवाहीया निंतिं निवेदन ब्यूगु खः । मंगलवाः सनिलय् सदरमुकाम गौरं ब्रम्हपुरीच्वंगु थःगु छेँय् वनाच्वंगु ईलय् प्यम्ह-न्याम्हसिया पुचलं हमला याःगु व नलकटुवा बन्दुकं स्यायेगु कुतः याः धासें सिंहं अपराधीतय्त कारवाही यायेत निवेदन ब्यूगु खः । प्रहरीयात ब्यूगु निवेदनय् हमला या:वपिं रन्तेश्वरप्रसाद व अरुणकुमारयात थम्हं म्हसिकाःगु तर मेपि म्हमस्यूगु खँ धाःगु दु ।
रौटहटया प्रहरीं धाःसा सभासद सिंहयात आक्रमण याःगु हल्ला वयेवं घटनास्थलय् शसस्त्र व जनपथ प्रहरी वनाः अनुसन्धान यावलय् अनया स्थानीयवासीत सुनां नं गोली चलेजूगु सः मताःगुलिं घटना अतिरन्जित जक जूगु निष्कर्ष पिकाःगु खः ।
