मन्त्रिपरिषदं नीति व ज्याझ्वः पारित
सरकारया पाखें संसदय् न्ह्यब्वइगु नीति व ज्याझ्वःयात मन्त्रिपरिषदया बैठकं पारित याःगु दु ।
मन्त्रिपरिषदया बुधवाः च्वंगु बैठकं सरकारया पाखें राष्ट्रपति डा. रामवरण यादवं संसदय् न्ह्यब्वइगु नीति व ज्याझ्वः पारित याःगु खः । राष्ट्रपति डा. यादवं बिहीवाः संसदय् सरकारया पाखें नीति व ज्याझ्वः न्ह्यब्वइगु ज्याझ्वः दु ।
अथेहे बुधवाःया बैठकं सचिवतय् बढुवा यायेगु जिम्मा प्रधानमन्त्री माधवकुमार नेपालयात ब्यूगु दु । नापं बैठकं परराष्ट्र मन्त्रालयया सल्लाहकारय् चिराजीवी नेपालयात चयन याःगु दु । अन्तर्राष्ट्रिय कानुन आयोगय् नेपाःया पाखें उम्मेदवारी बीत सुर्यप्रसाद सुवेदीयात चयन याःगु दु ।
प्यघौ तक च्वंगु मन्त्रिपरिषदया बैठकं आदिवासि जनजाति सूचिकृत यायेत गठन जूगु आदिवासी जनजाति कार्यदलया म्याद तनेगु निर्णया याःगु दु । आदिवासी जनजातिया सूचियात अद्यावधिक यायेत कार्यदलया संयोजकय् डा. ओम गुरुङयात राज्यमन्त्री सरह सुविधा बीगु निर्णय नं याःगु दु । अथेहे बैठकं बृहत जानकी विकाश कोषया अध्यक्षय् दिगम्बर राययात चयन याःगु दु ।
बैठकं सचिवतय् सरुवा व छनोटया निंतिं प्रधानमन्त्रीया संयोजकत्वय् दुगु प्रशासनिक समितियात जिम्मा ब्यूगु दु ।
(किपा: - http://www.madhavnepal.com)
