मानवअधिकार आयोगया ध्यानाकर्षण
राष्ट्रिय मानवअधिकार आयोगं मानवअधिकार उल्लङ्घन याःगु द्वपं बियातःपिं मनूतय् बारे आवश्यक छानबिन लिपा जक उमिगु वृत्ति विकासया निर्णय यायेत नेपाल सरकार नाप इनाप याःगु दु । आयोगं प्रधानमन्त्री व मन्त्रिपरिषदया ज्याकूयात छ्वःगु पौलय् थंज्याःगु निर्णय काये न्ह्यः मानवअधिकार हन्नय् संलग्न जू-मजूगु बारे आयोगं याःगु सिफारिसयात उचित ध्यान बीत इनाप याःगु दु ।
गुलिखें अधिकारीतय्त कारवाही यायेत आयोगं याःगु सिफारिस यात सरकारं कार्यान्वयन मयाःगु व अज्यापिं अधिकारीत व कर्मचारीत सुरक्षा संयन्त्र लगायत थीथी सरकारी सेवाय् कार्यरत जुयाच्वंगु खँ आयोगं सरकारयात च्वःगु पौलय् न्ह्यंथनातःगु दु ।
अथेहे अज्याःपिं अधिकारीत व कर्मचारीयात विभागीय वा न्यायिक कारवाही वा निगूलिं कारवाही न्ह्याकेत आयोगं याःगु सिफारिसया कार्यान्वयन जुइ न्ह्यः हे उमिगु पदोन्नति यायेगु, संयुक्त राष्ट्रसङ्घ लगायतया अन्तरराष्ट्रिय निकायलय् सेवा यायेत छ्वेगु वा मेमेगू कथं वृत्तिविकास वा प्रोत्साहन या:गु खनेदुगुलिं थंज्या:गु गतिविधिं दण्डहीनतायात थप ब्वलंकीगु व मानवअधिकार प्रति राज्यया प्रतिबद्धताय् न्हस: ब्वलनेफुगु पाखे नं सरकारया ध्यानाकर्षण या:गु दु ।
अथेहे रामेछाप जिल्लाया दोरम्बाय् नेपाली सेनां २०६० साल साउन ३२ गते नीछम्ह मनूतय्त नियन्त्रणय् कया: हत्या या:गु सम्बन्धय् आयोगं या:गु सिफारिस पूर्ण कार्यान्वयन यायेत नं आयोगं सरकारया ध्यानकर्षण या:गु दु ।
आयोगं दयाराम परियार, जनकपुरय् सपना गुरुङ, मोरङय् मैना सुनुवार, काभ्रेय् सरला सापकोटा, धादिङया हत्याया दोषीतय्त नापं कालीकोटया कोटवाडा व जनकपुरया साजीवलाल कर्ण लगायत न्याम्हेसिया हत्या या:गु द्वपं बियात:पिनि सम्बन्धय् नं स्वतन्त्र व विस्तृत अनुसन्धान याना: दोषीयात आवश्यक कारबाही व पीडित छेँज:यात उचित राहतका बीत माग या:गु दु । अथेहे थंज्या:गु घटना हाकनं जुइ मबीत आवश्यक सतर्कता नालेत सरकारं सुरक्षा निकायात सचेत याकेत सिफारिस या:गु ख: ।
मानवअधिकारया चरम उल्लङ्घन कथं कयात:गु थंज्या:गु घटनाया सम्बन्धय् आयोगं या:गु सिफारिसत अझं कार्यान्वयन मजूगु खँ आयोगं धा:गु दु ।
