हानं सुचारु जूगु संसद
निला ताःहाकःगु विवाद व तनाव लिपा अन्ततः म्हीगंनिसें संसद सुचारु जूगु दु । माओवादीं ल्ह्वनाच्वंगु मुद्दायात फुक्कं पार्टी जानाः सहलह यासें लिच्वः पिकायेगु शर्त सहित अवरुद्ध जुयाच्वंगु संसद चायेकेगु ज्या जूगु खः । संसद मन्ह्यानाः आपालं महत्वपूर्ण मुद्दाय् सहलह याये मखनाच्वंगु इलय् संसद न्ह्याके बीत माओवादी सहमत जूगु बांलाःगु ज्या खःसा थुकिया निंतिं माओवादीयात सहमत यायेत ताःलाःगुलिं प्रधानमन्त्रीयात सुभाय् बीमाः ।
देशय् ताःईया संघर्ष यानाः हानं संसद वःगु खःसां राजनीतिक पार्टीतय्सं उकियात सदुपयोग स्वयां अप्वः दुरुपयोग यानाच्वंगु दु । थुगुसी माओवादीं निला संसद अवरुद्ध याना बिलसा व स्वयां न्ह्यः नेपाली कांग्रेसं संसद अवरुद्ध यानाः ज्या पना तःगु खः । थःपिंसं संसद पना तःसा व संसदीय व्यवस्था जुइ मेपिंसं पन धाःसा वहे गैर संसदीय जुइ । पार्टीतय्सं उकियात थुकथं परिभाषित याइ ।
न्ह्यागुसां आः संसद चायेकाः बजेट पेश यायेगु ज्या जुइत्यंगु दु । तर माओवादीं थःपिंसं धयाच्वनागु खँयात लछिया दुने पूवंकेमाःगु खँ न्ह्यःने हःगु दु गुकियात सरकारं पूवंका बी धकाः बचं बिउगु दु । पूवंके धकाः बचं बीधुंकाः उकियात पूवंकाः हे त्वःतेगु ज्या नं यायेमाः । मखुसा माओवादीपाखें हानं संसद अवरुद्ध यानाः गतिविधि प्रभावित याना बीफु । माओवादीं धयाच्वंगु खँ यदि गलत खःसा उकियात गलत धकाः हे पुष्टि याना बीगु व सही खःसा सही कथं उपचार यायेगु ज्या सरकारं याना बीमाः । यदि अथे मजुल धाःसा थ्वहे कारणं यानाः मेमेगु संसदीय ज्या व संविधान निर्माण प्रक्रियाय् लिच्वः लाः वनी ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
