हल्लाया ल्यूने मवनेत गृहमन्त्रालया इनाप
हत्याया विरोधय् प्रदर्शन
मचाः अपहरणया हल्ला यानाः अपरिचित मनूतय्त दायेगु नापं स्यायेगु तकं जूगु घटना प्रति गृहमन्त्रीयं थःगु गम्भीर ध्यानाकर्षण जूगु खँ धाःगु दु ।
अप्वयावंगु थंज्याःगु घटना लिपाः बुधवाः गृहमन्त्रायं छगू प्रेस विज्ञप्ति पिथनाः मखूगु हल्लाय ल्यूने वनाः अपरिचित मनूतय्त दायेगु ज्या मयासें संका लगेजुसा: नापसं च्वंगु प्रहरी ज्याकूथी बुझेयायेत इनाप याःगु दु । अथेहे गृह मन्त्रालयं थंज्याःगु घटना दिकेत स्थानिय प्रशासनयात निर्देशन बियाःगु खँ नं धाःगु दु ।
अथेहे मंगलवाः मचाः अपहरण याःवःगु द्वपं बिया ख्वपय् निम्ह ल्याम्हत स्यागू विरोधय् सिपिनि छेँजः, स्थानीयबासी व विद्यार्थीतय्सं बुधवाः कोटेश्वर, जडिबुटी, कौशलटार, पेप्सीकोला लगायतया थासय् प्रदर्शन याःगु दु ।
छेँजः व स्थानीयबासीतय्सं मंगलवाः दा:याः सीम्ह येँया पाल्पाकोट सुकुम्बासीइ च्वनीपिं निम्ह ल्याम्हतय् स्यापिंत कारवाही यायेमाःगु माग यासें कोटेश्वर महानगरीय प्रहरी ज्याकू नं घेराउ याःगु खः । प्रदर्शनया झ्वलय् प्रहरीं लाठी चार्ज याःगु खसाः निगू पक्ष दथुइ ल्वापू जूगु ईलय् प्रहरी उपरीक्षक सहित न्याम्ह प्रहरी व खुम्ह प्रर्दशनकारीत घाःपाः जूगु खः ।
बुधवाः सुथंनिसें तनावग्रस्त जूगु कोटेश्वर, पेप्सीकोला, कौशलटार, जडिबुटी क्षेत्रय् सुथंनिसें सवारी साधन चलेजुइ मफुगु खसाः लिपाः प्रहरीया सकृयताय् निन्हय् निताःत्याः ईल निसें सुचारु जूगु खः । दोषीयात कारवाही यायेगु सहमति जुइवं प्रदर्शनकारीतय्सं सवारी आगमन सुचारु याकूगु खः ।
अथेहे प्रहरीं मंगलवाः घटनाय् संलग्न झिम्हेसित ख्वपं ज्वंगु दुसाः मेपिं निम्हेसित कोटेश्वरं ज्वंगू दु ।
मंगलवाः ख्वपःय् मचाः अपहरण याःगु द्वपं बियाः स्थानीयवासीतय्सं दाःगु ईलय् सविन क्षेत्री व जीवन गाहा थापा सीगू खसाः निम्ह सख्त घाःपाः जूगु खः ।
