भारतीय पक्षया धापू प्रति संसदीय पुचःया आपक्ति
दाङय् भारतीय पक्षं याःगु सीमा अतिक्रमणया घटनाबारे भारतीय उच्च अधिकारीतय्सं ब्यूगु अभिव्यक्ति प्रति संसदीय पुचलं आपक्ति प्वंकूगु दु ।
मंगलवाः सीमा अतिक्रमणया बारे अध्ययन यायेत निस्वंगु पुचःया प्रतिवेदन सार्वजनिक यासें समितिया सभापति पदमलाल विश्वकर्मां भारतीय विदेश सचिव शिवशंकर मेननया अभिव्यक्ति गैर जिम्मेवारपूर्ण व आपक्तिजनक जूगु खँ धयादीगु खू । वयेकलं यथार्थयात स्यंकेगु कथं सीमाय् अतिक्रमण जूगु घटनायात कपोकल्पित धाःगु खँ तसकं गैरजिम्मेवापूर्ण व आपत्तिजनक जूगु धयादिल ।
निवाः न्ह्यः नेपाल् भ्रमणया झ्वलय् विदेश सचिव मेननं सीमा अतिक्रमण मजूगु टिप्पणी यानादीगु खः । संसदीय पुचलं दाङ व बारय् भारतीय पक्षं सीमा अतिक्रमण व सीमावर्ती नेपामितय्त ज्यादती जारी जूगु निष्कर्ष पिकाःगु दु ।
समितिं सीमा विवाद समाधनया निंतिं आवश्यक थासय् सश्स्त्र सीमा सुरक्षा बल तयेमाःगु, आवतजावत व्यवस्थित यायेत अभिलेख तयाः परिचयपत्र सहित सीमा नियमन व्यवस्था यायेमाःगु लगायत झिंगूंगु बुँदे सुझाव ब्यूगु दु ।
