कार्यकारी अधिकार प्रादेशीक मन्त्रिपरिषदय्
देय् संघीय संरचनाय् दुहांवनेधुंका प्रत्येक प्रदेशया कार्यकारी अधिकार प्रादेशिक मन्त्रिपरिषदय् निहीत जुइगु जूगु दु ।
संविधानसभाया राज्यया शासकीय स्वरुप निर्धारण समितिया मंगलवाः च्वंगु बैठकं प्रत्येक प्रदेशया शासन व्यवस्था संचालनया अधिकार सम्बन्धीत प्रदेशया मन्त्रिपरिषदय् दइगु सहमति याःगु खः ।
प्रादेशिक मन्त्रिपरिषदं संविधान व मेमेगू प्रचचित कानुनया अधिकार अर्न्तगत कार्यकारिणी अधिकार छ्यली । अथेहे समितिं प्रादेशिक कार्यकारिणी प्रमुखपाखें स्विकृत नियामावली कथं प्रादेशीक सरकारया कार्यविभाजन व कार्यसम्पादन जुइगु व्यवस्थाया प्रस्ताव याःगु दु ।
नियमावलीया पालना जू-मजूगु धकाः गुं नं अदालतय् न्ह्यसः थने मदइगु व्यवस्था याःगु दु । समितिं तयार याःगु अवधारणा संविधानसभां पारित जुइधुंकाः संविधानया मस्यौदाय् न्ह्थनी ।
अथेहे समितिं न्ह्यब्वःगु प्रदेश प्रमुख व कार्यकारी प्रमुखया रुपय् मुख्यमन्त्रीया प्रस्ताव याःगु दु । प्रदेश प्रमुखया नियुक्ति राष्ट्रप्रमुखं सम्बन्धित प्रदेशया मुख्यमन्त्री नाप परामर्श यानाः याइसाः आवश्यक जुसाः पदावधि क्वचाये न्ह्यहे पदमुक्त यायेफइ ।
अथेहे प्रदेश प्रमुखं प्रादेशिक व्यवस्थापिकां निर्वाचित मनूतय्त मुख्यमन्त्रीलय् नियुक्त यायेगु प्रस्ताव याःगु दु । तर समितिइ केन्द्रीय सरकारया सम्बन्धय् धासाः अझं सहलह मयानी ।
