ठेकेदारी ज्याय् विद्यार्थी संगठनत

त्रिचन्द्र क्याम्पसय् नेवि संघ व अनेस्वरावियुया विद्यार्थीतय् दथुया ल्वापुइ गोली समेत प्रहार जूगु घटनां देशय् विद्यार्थी राजनीति नं राजनीतिया लँपु त्वःताः अपराधीकरणपाखे उन्मुख जुजुं वनाच्वंगु आभास बिउगु दु । उकुन्हुया ल्वापु गुगु कारणं जुल अले गुगु ढंगं जुल व निश्चय नं सकल नेपाःमिया निंतिं चिउताःया विषय खः ।

उगु ल्वापु मुलतः क्याम्पसय् निर्माण यायेगु छगू भवनया ठेक्का सुयात बीगु धइगु खँयात कयाः जूगु जुयाच्वन । आखः ब्वनेमाःपिं विद्यार्थीतय् ध्यान थौंकन्हय् गुखेपाखे वनाच्वन धइगु खँया छगू नमूना थुकिं क्यं । युनियन चायेकाः विद्यार्थी हकहितय् ज्या यायेमाःपिं विद्यार्थीतय्सं ठेकेदारी ज्याय् ल्हाः तः वंगु स्वयमय् अस्वाभाविक ज्या खः ।

नेपालय् ठेकेदारी ज्या आः छगू आपराधिक नेटवर्क दुने लाः वनेधुंकूगु दु । ठेकेदारतय्सं गुण्डा लगे यानाः मेंपिंत टेण्डर तकं तयेके मबीकेगु व उगु ज्या थःगु ल्हातय् लाकेगु आः सामान्य जुइ धुंकल । उकी न्हापा पेशेवर गुण्डात छ्यलीगु खःसा आः थीथी राजनीतिक पार्टीलिसे आवद्ध युवा संगठनया कार्यकर्तातय्त छ्यलेगु याना हःगु दु । माओवादीया वाईसीएल एमालेया युथ फोस्र व कांग्रेसया तरुण दल तकं थुकी संलग्न दु । आः युवा संगठन जक मखु विद्यार्थी संगठनं नं उकी ल्हाः तया हयेधुंकल खिनं । त्रिचन्द्रय् जूगु ल्वापु उकिया हे लिच्वः खः । आपराधिक ज्यायात विद्यार्थी संगठन व युवा संगठनतय्सं वैधानिकता बियाः न्ह्याकेगु थ्व गुगु प्रवृत्ति देशय् शुरु जूगु खः थुकिं मुलुक गुलि भयावह अवस्थाय् थ्यनेधुंकल धइगु खँ बांलाक हे क्यना बिउगु दु । नेतात सचेत जुइमाःगु दु ।

More Stories Like this