मचा अपहण याःवगु द्वपंबिया दा: वलय् निम्ह सित

मचा अपहरण याःवगु धासें थिमिया स्थानीय वासिन्दातय्सं दा: वलय् निम्ह सिगु दुसा: मेपिं निम्ह घाःपाः जूगु दु । हिमचुली बोर्डिङ्ग स्कूलय् ब्वनिम्ह मचायात अपहण याःवगु द्वपं बिया थिमि नगरपालिकाया वडा नं १०या चपाचोया स्थानीयबासितय्सं प्यमेसित मरणासन्न जुइक दाःगु खः ।

च्याम्हया पुचःलय् वःपिं मध्ये स्वम्ह बिस्यूवनेत ताः लाःगु खसाः घा:पा: जूपिंतं प्रहरीं उद्धार याना: यल ग्वार्कोया बी एण्ड बी अस्पतालय् भर्ना याकूगु ख: । घा:पा जुपिं निम्ह अस्पतालय् वासः याकाच्वंगु ईलय् मदुगु खसा: निम्ह अझ अस्पतालय् वास: याकतःगु दु । थिमि प्रहरीया कथं २२/२३ दँ दुपिं सिपिनी सनाखत जुइफुगु मदुनी । घाःपाः जुपिं मध्यय् छम्ह बसन्त लामा जूगु खँ प्रहरीं धाःगु दु । अथेहे मेम्ह छम्हसिया नां अझ सीके फुगु मदुनी । घटनाय् संलग्न जूगु द्वपंलय् प्रहरीं छम्हेसित ज्वंगु दु ।

थिमि प्रहरी ज्याकूं ब्यूगु सूचं कथं घटना धाथें अपहरण या: व:गु खला वा मेगु हे छुं कारणं व: घटना जूगु ख: धका छानबिन लिपा तिनि सीदइगु खँ धा:गु दु । अपहरण या:वपिं नाप खुकुरी, रड आदि नं बरामद जुइगुलिं घटना थप रहस्यमय जूगु खः । म्हिग अन निगू पुचः दथुइ ग्याङ फाइट जूगु व थौ नं वकीया हे निरन्तरता जुइफुगु आशंका प्रहरीं याःगु दु ।