खुलाया दुने माओवादी सेना समायोजन : प्रधानमन्त्री
प्रधानमन्त्री माधवकुमार नेपालं खुलाया दुने माओवादी सेनाया समायोजन व पुनःस्थापन यानाः शान्ति प्रकृयायात तार्किक निष्कर्षय् थ्यंकेगु प्रतिबद्धता प्वंकादीगु दु ।
मंगलवाः राष्ट्रसंघीय शान्ति मिसन अनमिनया प्रमुख करिन ल्याण्डग्रेन नाप नापलायेगु झ्वलय् प्रधानमन्त्री नेपालं दलत दथुइ सहमतिया वातावरण निर्माण जूगुलिं थ्व खँ सम्भव जूगु धयादिल । वयेकलं माओवादी सेना समायोजन व पुनःस्थापना स्वलाः निसें खुलाःया दुने क्वचायेकाः शान्ति प्रकृयाया निष्कर्षय् थ्यंकीगु धयादिल ।
प्रधानमन्त्रीं न्हापाः दलत दथुइ असमझदारीया कारणं सेना समायोजनय् गठित विशेष व प्राविधिक समिति निष्कृय जूगु व आः न्हूगु वातावरण निर्माण जूगुलिं ज्या द्रुत गतिइ न्ह्यावनीगु विश्वास प्वंकादिल । अथेहे अनमिनया प्रमुख ल्याण्डग्रेननापया सहलहस अनमिनया म्याद खुलाःया निंतिं तनेत सरकारं इनाप याःगु विषयलय् नं सहलह जूगु खः ।
राष्ट्रसंघया बैठकय् ब्वति कायेत न्यूयोर्क झायेन्ह्यः अनमिन प्रमुख ल्याण्डग्रेनं मंगलवाः प्रधानमन्त्रीयात नापलानादीगु खः । थ्वस्वयां न्ह्यः ल्याण्डग्रेनं रक्षामन्त्री विद्या भण्डारी, कांग्रेस सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल लगायत नेतातय्त नापलानादीगु खः ।
(किपा: - http://www.madhavnepal.com)
