शान्ति स्थापना मजूगुलिं ज्ञानेन्द्र दुखी

पुलांम्ह जुजु ज्ञानेन्द्र शाहं हिलावंगु परिवेशय् नं देश व जनताया स्थितिइ सुधार मवःगुलिं थः तसकं चिन्तित व दुखी जूगु खँ धाःगु दु ।

थःगु ६३दँया बुदिंया लसताय् छगू प्रेश वक्तव्य पिथंसें ज्ञानेन्द्रं थः राष्ट्रियता, राष्ट्रिय एकता व युगसम्मत प्रजातन्त्रप्रति न्ह्यावलें नं प्रतिबद्ध जूगु खँ धा:गु दु । वक्तव्यय् थःम्हं नारायण्हिटी त्वतुगु दच्छि जुसां देशय् शान्ति, सुरक्षाया स्थितिइ सुधार मवःगुलिं दुःख प्वंकूसें पुलांम्ह जुजु ज्ञानेन्द्रं थम्हं न्ह्यावलें शान्त, समृद्ध, सुन्दर व नेपामित सन्तुष्ट जुइमाः धइगु मनंतुनाःगु खँ न्ह्थंनातःगु दु ।

दच्छिया दुने थः व थःगु छेँजः प्रति सकारात्मक व नकारात्मक निगुलिं टिप्पणी प्रति थः जानकार दुगु धासें सकारात्मक टिप्पणी यापिंत आभार नं व्यक्त यानादीगु दु ।