छुं नं हालतं सैनिक सर्वोच्चता लागू यायेबीमखु : प्रम

सैनिक सर्वोच्चताया न्ह्यने क्वछुइगु वाः नागरिक सर्वोच्चताया पक्षय् दनीगु : प्रचण्ड

प्रधानमन्त्री माधवकुमार नेपालं देशय् छुं नं हालतं सैनिक सर्वोच्चता लागू यायेमबीगु खँ धयादीगु दु ।

ताः ई न्ह्यः निसें नागरिक सर्वोच्चताया माग तया संसद अवरुद्ध यानाच्वंगु एकीकृत नेकपा (माओवादी) नाप जूगु सहमति कथं सोमवाः व्यवस्थापिका संसदया बैठकय् सम्बोधन यानदिसें प्रधानमन्त्री नेपालं झी सुंनं सैनिक सर्वोच्चताया पक्षय् मदुगु धासें छुं नं हालतं सैनिक सर्वोच्चता लागू यायेमबीगु व यायेमफइगु धयादिल । वयेकलं नागरिक सर्वोच्चताया विषयस दलत दथुइ हे मतान्तर दुगु धासें सहमतिया माध्यम थुकीया बारे साझा धारण पिकायेगु धयादिल ।

प्रधानमन्त्री जुइधुंकाः संसदय् न्हापांगु खुसी संम्वोधन यायेगु झ्वलय् प्रधानमन्त्री नेपालं माओवादी ल्ह्वंगु मागया बारे दलत दथुइ सहलह यानाः लच्छिया दुने सहमति मालेगु प्रतिबद्धता प्वंकादिल । देशय् जुयाच्वंगु संक्रमणकालीन स्थितिं याकनं मुक्त यायेत सहमति व सहकार्य यानाः न्ह्यावनेत प्रधानमन्त्री नेपालं सकसितं इनाप यानादिल । वयेकलं हिंसाया बलय् राजनीति सफल मजुइगु धयादिसें शान्ति सुरक्षा कायम यायेगु निंतिं सुयातं नं छुट मबीगु धयादिल । वयेकलं शान्ति सुरक्षा कायम यायेगु प्रतिबद्धता प्वंकादिल ।

संसदय् सम्वोधनया झ्वलय् वयेकलं न्हापाया कटुता ल्वमंकाः न्ह्याः वनेत इनाप यानादिल । वयेलकं थःगु नेतृत्वया सरकार लोकतान्त्रिक विधि कथं जूगु धासें माऒवादीं रिमोट कन्ट्रोल पाखें थः प्रधानमन्त्री जूगु धापूया प्रतिबाद यानादिल । वयेकलं ६०१ दुजः दुगु संसदय् ३५९ मत हयाः प्रधानमन्त्री जुम्ह रिमाट कन्ट्रोल कथं प्रधानमन्त्री जूगु जुइ वा २३८मत हःगु दल गनं वःगु जुइ धकाः न्ह्यसः तयादिल । वयेकलं माओवादी अध्यक्ष प्रचण्डंयात संकेत यासें थुगु खँपाखें सत्ता त्वतेगुया पीडा गुलि जुइ धकाः क्यंगु धयादिल ।

अथेहे प्रधानमन्त्री नेपालं संसदय् सम्वोधन याये न्ह्यः सभामुख नाप विषेश ई कयाः न्ववायेगु झ्वलय् एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' प्रधानसेनापतिं लोकतन्त्र प्रति छुं नं कथंया सम्मान मक्यंगु धयादिल । वयेकलं थः प्रधानमन्त्री जूगु ईलय् यक्वं सेनाया अधिक्रित निसें नेपाली सेनाया जवानत नाप सहलह यायेगु झ्वलय् लोकतन्त्रप्रति सम्मान भाव खंकाःगु तर प्रधानसेनापितं उल्टां अप्पान याःगु धयादिल ।

वयेकलं आः २००७ सालं निसें आः तक जूगु दक्वं परिवर्तन नेपाली सेना दुने लोकतान्त्रिकरण मजूगुलिं लोकतन्त्र खताराय् लाःगु दाबी यानादिल । थुगु खँ पाखे मेमेगु दलं उलि च्यूता मतसें उल्टा सैनिक सर्वोच्चताय् अप्व प्राथमिकता ब्यूगु द्वपं बियादिल ।

माओवादी प्रचण्डं सोमवाः छगू राष्ट्रिय न्हिपौलय् पिहांवःगु सैनिक पृतनायात प्रधानसेनापति रुक्मांग कटवालं हाइ एलर्टय् च्वनेत छ्वःगु परिपत्रया खँ न्ह्यथंसें थःपिं सहमतिया लँपू मालाच्वंगु ईलय् माओवादी लडाकूतय् शिवर व वाइसिएलयात कडा निगरानी त्येत ब्यूगु आदेशयात षड्यन्त्र जूगु धयादिल । वयेकलं थ्व केवल संयोग वा मेगू षड्यन्त्र खः धकाः न्ह्यसः तयादिल । वयेकलं सरकारयात थुकीया बारे तुरुन्त प्रधानसेनापतियाके स्पष्टिकरण कयाः कारवाही यायेत माग यानादिल । अथे मयासाः थ्व सरकार जंङ्गी अद्दाया कतामरी धकाः पुष्टि जुइगु धयादिल ।

पुलांम्ह प्रधानमन्त्री नं जुयादिम्ह प्रचण्डं राष्ट्रपति डा. रामवरण यादवं जननिर्वाचित सरकारं प्रधानसेनापतियात पदमुक्त याःगु निर्णययात हीकाः प्रधानसेनापतिया पदबहालि यानाः नागरिक सर्वोच्चताय् खेलवाद याःगु धयादिल । वयेकलं झीगू न्ह्यने यक्ष प्रश्न वःगु धासें झी सैनिक सर्वोच्चताया न्ह्यने क्वछुइगु वाः नागरिक सर्वोच्चताया पक्षय् दनीगु धयादिल । माओवादी अध्यक्ष प्रचण्ड शान्ति प्रकृया स्यंकेगु प्रतिक्रान्तिकारीतय् षड्यन्त्र विफल यायेत संसद अवरोध अन्त्य यानागु धासें लच्छिया दुने नं राष्ट्रपतिया असंवैधानिक पलाः व नागरिक सर्वोच्चताय बारे सहमति मजूसाः कडा आन्दोलन यायेगु ख्याच्वः बियादिल ।

अथेहे वयेकलं मुठभेडया अवस्था सृजना ब्वलंकेमबीत व शान्ति प्रकृया व संविधान निर्माणया ज्या मस्यंकेत थम्हं सरकारं राजीनामा बियागु धयादिल । वयेकलं माओवादीं दकलये तंधंगु दल जुया जिम्मेवार जुया न्ह्या वनेमाःगु खँयात आत्मसाथ यानाः संसद न्ह्याकेगु निर्णय याःगु धयादिल ।

थ्वसवां न्ह्यं सोमवाः एमाले, नेपाली कांग्रेस व माओवाद दथुइ जूगु सहलहलय् माओवादीं ल्ह्वंगु मागत दुथ्याकाः प्रधानमन्त्रीं संसदय् सम्वोधन यायेगु सहमति जुइवं माओवादीं संसद न्ह्याकेबीगु निर्णय या:गु खः ।