नेवाः दुनेया उत्पीडित जातिया विकास

नेवाः जाति नेपाःया उत्पीडित जाति मध्यय् छगू खः । उकी दुने नं अप्वः उत्पीडनय् लानाच्वंगु जातीय पुचः खः द्यःला नायः आदित । नेवाः समाज दुने थीत्यः मत्यः प्रथा मदु धइगु खँ इतिहास अध्ययन यायेबलय् खनेदुसां वंगु सदियौं निसें राज्यसत्तां जबर्जस्ती लादे याना तःगु सामाजिक प्रचलनं यानाः थ्व जातया मनूत सामाजिक बहिष्करणय् लाना वयाच्वंगु खः । थुकिया लिच्वः कथं थुपिं नेवाः खयां नं नेवाःतय् प्रचलित आर्थिक, सामाजिक, राजनीतिक धारय् गबलें नं समाहित जुइ मफु । थुकिं उमित सदां आर्थिक सामाजिक शोषणय् लाकाः ध्याकुनय् वांछ्वयेगु ज्या जुयाच्वन ।

थौं देशय् युगान्तकारी हिउपाः वयेधुंकल । नेवाः जक मखु देशय् दक्व हे जातिया मनूतय्त थ्व हिउपालं थीधुंकल । थ्व अवस्थाय् नेवाः समाजया थ्व समुदाय नं बिस्कं च्वने मफइगु निश्चित दु । नेवाःया विकास धायेबलय् खालि कथित च्वय्या जाति धाःपिनिगु जक विकास मखु । फुक्कं जातिया विकास खः । थ्व समुदायया विकास मजुइकं समग्र नेवाःया विकास सम्भव मदु । तर सदियौं तक लिउने लाका तःगु जाति जूगु कारणं आः उमित विशेष आरक्षण वा उच्च प्राथमिकता बियाः जूसां विकासया मूलधारय् न्ह्यःने हयेमाःगु आवश्यकता दु । थज्याःगु हे खँयात वाःचायेकाः आः नकतिनि देय्या उत्पीडित द्यःलातय्त राजनीतिक रुपं समेत सचेत यायेगु ताः तयाः नेपाल द्यःला (पोडे) उत्थान माच नीस्वंगु दु । माचं तःगु उद्देश्य अतिकं स्पष्ट व सामयिक जू । थुकिं केवल द्यःला जक मखु देय्या मेमेगु उत्पीडित समुदाययात नं थःगु अधिकार प्रति जागरुक जुइकेगु कथंया पलाः थ्व पाय्छि इलय् न्ह्याका यंकेगु स्वःसा बांलाइ ।

More Stories Like this