सदन चायेकेत जुयाच्वंगु विफल कुतः

न्हूगु सरकारया नीति तथा कार्यक्रम व बजेट पेश यायेगु लागिं सदन न्ह्याकेत जुयाच्वंगु कुतः म्हिगः नं विफल जूगु दु । थुकिया लागिं थौं हानं मेगु वार्ता यायेगु तयारी जुयाच्वंगु दुसां थ्व नं ताःलाइगु सम्भावना धाःसा तसकं म्हो दु । माओवादीं जारी यानाच्वंगु सदन अवरुद्धया ज्याझ्वः लित मकाःगु कारणं सदनय् सरकारया नीति तथा कार्यक्रम व बजेट पेश यायेगु ज्या तकं प्रभावित जुयाच्वंगु खः ।

बजेट पेश यायेत जुयाच्वंगु कुतलय् विपक्षी माओवादी व सत्तापक्षी एमाले-कांग्रेस निगुलिं पुचः थःथःगु अडानय् कायम जुयाच्वंगुलिं लिच्वः पिहां वये मफयाच्वंगु खः । माओवादीं सदनया लुखा चायेका मबिउतले बजेट वइगु सम्भावना मदुसा बजेट मवल धाःसा कर्मचारीयात तलब नकेगुनिसें कयाः देय्या मेमेगु आर्थिक ज्याझ्वः तकं प्रभावित जू वनीगु निश्चित दु । तर थज्याःगु मुद्दाय् तकं निगुलिं पक्ष छफुति हे लिचिलेत तयार मजुसे अडिग जुयाच्वंगु धाथें नं विडम्बनाया खँ खः । थज्याःगु मामिलाय् क्वमालि जुयाः खँ न्ह्यःने हयेमाःम्ह सत्तापक्षी खः । तर थन सत्तापक्षी माओवादीया छुं हे खँ न्यनेत तयार मदु । गुकिं यानाः समस्या समाधान जुइगु छुं हे संकेत मदु । यदि थ्वहे खँय् द्वन्द्व तच्वया वन धाःसा उकिं माओवादीयात छुं हे लिच्वः लाइ मखु । उपिं ला द्वन्द्व अझ तच्वया वंसा हे जिउ धाईपं खः । कांग्रेस सरकारय् सहभागी जक जुयाच्वंगु दु सरकारं गति मकाःसां वयात छुं लिच्वः मलाः । समस्याय् लानाच्वंम्ह धइम्ह एमालेपाखें प्रधानमन्त्री जुयादीम्ह भाजु माधव नेपाल खः । यदि बजेट मवयाः स्थिति स्यन धाःसा फुक्क दोष वय्कःया छ्यनय् वइ ।

More Stories Like this