'माओवादी याके बहुमत मदयेधुंकल'
नेकपा (एमाले)या वरिष्ठ नेता केपी शर्मा ओली व एमाले पाखें हे संचारमन्त्री जुयादिम्ह शंकर पोखरेलं माओवादी याके बहुमत मधय्धुंकूगु धासें दुसाः क्यनेत हाध्या बियादीगु दु ।
शनिवाः प्रेस चौतारीं ख्वपय् याःगु छगू ज्याझ्वलय् न्ववासें सुचना व संचार मन्त्री शंकर पोखरेलं सरकारय् राजनीतिक दलया बहुमत तंकेवं एकीकृत नेकपा (माओवादीं) नागरिक सर्वोच्चताया माग यासें सरकारपाखें राजनीमा ब्यूगु द्वपं बियादिल । वयेकलं संसदय् माओवादीं बहुमत तंकेधुंकूगु धासें थ्व सत्ययात माओवादीं थुइकेमाः धयादिल ।
सरकराया प्रवत्ता नं जुयादिम्ह मन्त्री पोखरेलं संसदया लुखाः तिनाः नागरिक सर्वोच्चताया खँ ल्हाइपिं माओवादीतय् नियत प्रष्ट मजूगु द्वपं बियादिल ।
अथेहे शनिवाः हे येँय् जूगु मेगू छगू ज्याझ्वलय् एमालेया वरिष्ठ नेता केपी शर्मा ओलीं संसदय् बहुमत खाकाः सरकरा गठन यायेत माओवादीयात हाथ्या बियादिल । वयेकलं पेश्की बजेट संसदय् पेश यायेबीगु माओवादीया 'प्रोपोगण्डा' जक जूगु द्वपं बियादिल ।
ओखलढुंगा - येँय् सम्पर्क माञ्चं ग्वसाः ग्वःगु ज्याझ्वलय् नेता ओलीं माओवादीं थःगु नेतृत्वय् राष्ट्रिय सरकार गठन यायेत त:गु प्रस्ताव यात लक्ष्ति यासें धयादिल, - '२३८ सिट दुपिंसं न्ववाया जक जुइ मखु । फुसाः ३०१ खाकाः सरकार गठन यानाः क्यनेब्यू ।'
वयेकलं माओवादी संविधान निर्माण यायेगु ज्याय् जिम्मेवार मजूगु द्वपं बियादिसें माओवादीया गुंलाःया सरकारय् शान्ति प्रकृयाय् छुं नं ठोस ज्या यायेमफुगु धयादिल ।
