संविधान इलय् पिहां मवइगु शंका

आकिवं तकया दुने तयार यानाः जनताया न्ह्यःने हयेमाःगु संविधान इलय् मवइगु खँय् सम्बद्ध विज्ञतय्सं आशंका व चिउताः प्वंकूगु दु । वर्तमान संविधानसभाया मुख्य संविधान दयेकेगु खःसां राजनीतिक पार्टीतय् दथुइ ब्वलनाच्वंगु थवंथवय्या द्वन्द्व व खिंचातानीया कारणं संविधान दयेकेगु ज्या प्रभावित जू वनाच्वंगु दु । यदि देय्या राजनीति थ्वहे तालं न्ह्यानाच्वन धाःसा संविधान च्वयेगु ज्या इलय् सिधयेके मफइगु निश्चित दु । पार्टीया नेतातय्सं संविधान च्वयेगु ज्या इलय् सिधइ चिन्ता कायेम्वाः धकाः आश्वासन बियाच्वंसां उकियात पत्याः यायेगु आधार धाःसा पटक्क हे मदु । छाय्धाःसां थौं तक नं फुक्क पार्टीया शिर्षस्थ नेतातय्सं छगू पार्टीं मेगु पार्टीयात ब्वः बीगु सरकारया समीकरण बारे बिचाः ब्याकेगु व मेपिंत शान्ति सुरक्षाया विरोधी धकाः आलोचना यायेगु बाहेक संविधान गय् यानाः दयेकेगु छु छु बुँदाय् गज्याःगु खँ दुथ्याकेगु धकाः गबलें नं सहलह याःगु मदुनि । संविधानसभाय् दुथ्याःगु २४ दलया मंकाः बैठक थौं तक नं निगू वा स्वंगू पार्टीया कचवंयात कयाः बिचाः बीगु लागिं बाहेक संविधानया बुँदायात कयाः गबलें नं च्वंगु मदुनि । माओवादी कांग्रेस व एमाले थेंज्याःगु तःधंगु पार्टीया शीर्ष नेतातय् दथुइ आः तक छगू हे बैठक संविधानयात कयाः जूगु मदुनि । उकिं राजनीतिक पार्टी व उकिया नेतातय्सं धाथें इलय् संविधान दयेकी धइगु आशा आः धमाधम म्हो जुजुं वनाच्वंगु दु । यदि इलय् संविधान दयेके मफुत धाःसा देशय् गज्याःगु ग्यानापुगु माहौल सिर्जना जुइ धइगु खँ राजनीतिक पार्टीया नेतातय्सं बांलाक हे मनय् तयाः माःकथंया पलाः न्ह्याकेमाःगु अतिकं आवश्यक जुयाच्वंगु दु ।

More Stories Like this