राष्ट्रिय सरकारया विकल्प मदु : कोइराला
नेपाली कांग्रेसया सभापति गिरिजाप्रसाद कोइरालां राष्ट्रिय सरकारया विकल्प मदुगु खँ धयादीगु दु । वयेकलं सरकारया नेतृत्व न्हाःगु दलं यासां निर्धारित ईया दुने हे संविधान निर्माण यानाः राष्ट्रिय सरकार निर्माण यायेमाः धयादिल ।
सभापति कोइरालाया गृह जिल्ला विराटनगरं शुक्रवाः येँय् लिहाझाये न्ह्यः प्रेस युनियन मोरङ शाखां ग्वसाःग्वःगु पत्रकारत नापलायेगु ज्याझ्वलय् न्वावयेगु झ्वलय् सभापति कोइरालां थंज्याःगु खँ धयादीगु खः । वयेकलं निर्धारित ईया दुने हे संविधान निर्माण मजूसाः थुकीया न्हापांगु सिकार माओवादी हे जुइगु धयादिसें परिस्थितिया बाध्यताया कारणं माओवादी सहमतिइ वइगु दाबी यानादिल ।
वयेकलं आःया राजनीतिक अवस्थाया गतिरोध अन्त्य यायेत माओवादी सहमतिइ मवःसाः देशय् अराजकता अप्वइगु धयादिल । सभापति कोइरालां निन्हु-प्यन्हुया दुने हे संसदया गतिरोध अन्त्य जुइगु दाबी यानादिसें आः नं माओवादीं संसद अवरुद्ध यासाः उकीया दुष्परिणमया जिम्मा माओवादीं हे कायेमाः धयादिल । १२ बुँदे समझदारी निसें आः तक अन्त्यय् वया जक सहमति जुइगु जुयाच्वंगु धासें कोइरालां आ: नं खँ जुयाच्वंगु व खँ सहमतिया लिक थ्यंगु धयादिल ।
राष्ट्रपतिया पलाः बारे कांग्रेसया अडान यथावत जूगु जानकारी बियादिसें सभापति कोइरालां नेपालय् नं भारतया राष्ट्रपतिया थें अधिकार बीमाःगु पक्षय् कांग्रेस दुगु खुलासाः यानादिल । वयेकलं सीमा विवाद कुटनीतिक पहलं समस्या ज्यंकेमाः धासें नेपाः व भारतया सरकारी पक्षं सहलह यानाः समस्या समाधान जुइगु धयादिल ।
