स्थानीय निकाय राजनीतिक संयन्त्र कथं : शेर्मा
स्थानीय विकास मन्त्री पूर्णकुमार शेर्मां देशय् शान्ति स्थापना जुइमफुगुलिं स्थानीय निकायया निर्वाचनया सम्भावना मदुगु खँ धयादीगु दु ।
रिपोर्टस क्लबं शुक्रवाः येँय् याःगु ज्याझ्वःलय् न्ववासें मन्त्री शेर्मां स्थानीय निकायलय् पुर्नबहाली तकं जुइमफइगु जूगुलिं राजनीतिक संयन्त्र मार्फत स्थानीय निकाय संचालन याइगु खँ धयादिल । मन्त्री शेर्मां स्थानीय निकायलय् पुलांपिं हे प्रतिनिधित पुर्नबहालीया माग नं पुलां जुइधुंकूगुलि राजनीतिक सहमतिया संयन्त्रया आधारय् संचालन यायेगुया विकल्प मदु धयादिल ।
मन्त्री शेर्मां राज्य पुर्नसंरचनाया प्रकृयाय् दुगु न्हूगु संविधानं निर्धारणया कथंया संघीय विधिया आधारय् गज्याःगु स्थानीय निकाय जुइगु धकाः स्पष्ट जुइधुंकाः जक निर्वाचन जुइफइगु धयादिल । वयेकलं थःपिं राष्ट्रिय सहमतिया सरकारया पक्षय् दुगु तर माओवादीं हे सहमतिया राजनीति त्वाःथःगु द्वपं बियादिसें माओवादीं नं एमाले नेतृत्वया सरकारय् ब्वति कायेमाः धयादिल ।
