संसद संचालन यायेत च्वंगु बैठक बिना निष्कष क्वचाल
संसदया पंगः ज्यंकेगु विषयसं एकीकृत नेकपा (माओवादीं) बिहीवा: गठबन्धन सरकारया मू निगू घटक नेपाली कांग्रेस व नेकपा (एमाले)लिसे या:गु ब्यागलं ब्यागलं सहलह बिना निष्कष क्वचा:गु दु ।
माओवादी संविधानसभा दलया ज्याकुथिइ माओवादी व एमालेया शीर्ष नेतातय्गु बैठक च्वंगु खः । बैठकय् माओबादीया नायः प्रचण्ड, वरिष्ठ नेता डा. बाबुराम भट्टराई, नारायणकाजी श्रेष्ठ लगायतया नेतातय्गु ब्वति दुगु खःसा एमालेयापाखें प्रधानमन्त्री माधवकुमार नेपाल, नायः झलनाथ खनाल लगायतया नेतातय्गु ब्वति दुगु खः ।
बैठकलिपा एमालेया छ्याञ्जे व साचारमन्त्री शंकर पोखरेलं थौंया सहलह सकारात्मक जूगु व कन्हय् सुथय् मेगु बैठक च्वनाः क्वःछुइगु धयादीगु दु । सहलहस सदनय् जुयाच्वंगु पंगः तच्वःगु समस्या निगू दलया नेतातय्त महसुस या:गु धयादिल । वेयकलं हिउँदे अधिवेशन क्वःचायेकाः बजेट अधिवेशन न्ह्याकेत निगू दल सकारात्मक जूगु धयादिल ।
एमाले लिसेया सहलह लिपा: माओवादीं नेपाली कांग्रेसलिसे सहलह न्ह्याकूगु ख: । माओवादी संविधानसभा दलया ज्याकुथिइ हे ग्वसाः ग्वःगु सहलहस माओवादी नेतृत्वया ब्वति दुगु खःसा कांग्रेसया संसदीय दलया नेता रामचन्द्र पौडेल, महामन्त्री विमलेन्द्र निधि लगायतया नेतातय्गु बैठकय् ब्वति दुगु खः ।
बैठकय् कांग्रेसं बजेट पेश यायेगु निंतिं संसदया गतिरोध यायेत प्रस्ताव तःगु खसाः माओवादीं पेश्की बजेत हसाः जक संसद न्ह्याके बीगु अडान कायेवं बैठक बिना निष्कर्ष क्वचाःगु खः । बैठकय् माओवादीं राष्ट्रपतिया पालाः भिंकेमाःगु माग यासें संविधान संशोधन यानाः राष्ट्रपति व प्रधानमन्त्रीया असधाकार स्पष्ट यायेमाःगु माग याःगु खः ।
राष्ट्रपतिया असंवैधानिक पलाःयाविरुद्ध नागरिक सर्वोच्चता माग यासें सरकारपाखें पिहांवंगु माओवादीं सदन व सतकय् छक्वःपतिकं संघर्ष यानाः वयाच्वंगु दु । माओवादीं प्रधानमन्त्रीया सम्बोधनपाखें राष्ट्रपतिया असंवैधानिक पलाःया विरुद्ध सदनय् संकल्प प्रस्तावयात सहलहया निंतिं दुथ्याकेमाःगु माग तःगु दुसा नेपाली कांग्रेसं धाःसा उगु विषययात अस्वीकार यानाः वयाच्वंगु खः ।
